پاکستان بحریہ کو جدید چینی آبدوزوں کا بیڑا ملنے کا امکان

بیجنگ (ڈیلی اردو) پاکستان کو جدید چینی ساختہ آبدوزوں کا ایک بیڑا ملنے جا رہا ہے، جو پاک چین دفاعی تعاون میں ایک اہم پیش رفت قرار دی جا رہی ہے۔

تفصیلات کے مطابق یہ آبدوزیں چینی ساختہ جے-10 سی لڑاکا طیاروں کے علاوہ ہیں، جنہیں گزشتہ سال پاکستان اور بھارت کے درمیان کشیدگی کے دوران پہلی بار عملی طور پر آزمایا گیا تھا۔

پاکستان اور چین کے درمیان طویل عرصے سے دفاعی تعاون جاری ہے، اور حالیہ صورتحال کے بعد اس میں مزید اضافہ دیکھا گیا ہے۔ اسلام آباد کے مطابق چینی طیارے گزشتہ تنازعے میں فضائی کارروائیوں کا حصہ تھے، جن میں بھارتی رافال طیاروں کو نشانہ بنایا گیا تھا۔

چین کے شہر سانیا میں پہلی آبدوز کو پاکستانی بحری بیڑے میں شامل کرنے کی تقریب منعقد ہوئی، جس کا نام "ہانگور" رکھا گیا۔ اس تقریب میں پاکستان کے صدر آصف علی زرداری اور بحریہ کے سربراہ ایڈمرل نوید اشرف نے شرکت کی۔

سرکاری بیان کے مطابق یہ منصوبہ آٹھ آبدوزوں پر مشتمل ہے، جن میں سے چار چین میں تیار کر کے پاکستان کو دی جائیں گی جبکہ چار پاکستان میں ٹیکنالوجی ٹرانسفر کے تحت تیار ہوں گی۔

ایک اعلی سرکاری اہلکار کے مطابق مستقبل میں پاکستان ان آبدوزوں کی مقامی سطح پر پیداوار اور برآمدات کی صلاحیت بھی حاصل کر لے گا۔

بحریہ کے سربراہ ایڈمرل نوید اشرف نے اسے “بحری دفاع کو جدید بنانے میں اہم سنگ میل” قرار دیا، جبکہ آبدوزوں کو جدید ہتھیاروں، سینسرز اور ایئر انڈیپنڈنٹ پروپلشن سسٹم سے لیس قرار دیا گیا ہے۔

یہ پیش رفت ایسے وقت میں سامنے آئی ہے جب پاکستان نے حالیہ ہفتوں میں اپنے میزائل سسٹمز کے بھی کئی تجربات کیے ہیں۔