پاکستان بھارت سرحد پر رات بھر گولہ باری

اسلام آباد/نئی دہلی (ڈیلی اردو) بھارت کے زیرِ انتظام کشمیر کے سرحدی ضلع راجوری میں لائن آف کنٹرول (ایل او سی) پر فائرنگ کا واقعہ پیش آیا ہے، جسے گزشتہ سال پاکستان اور بھارت کے درمیان ہونے والی فوجی کشیدگی کے بعد سرحد پر پہلی بڑی خلاف ورزی قرار دیا جا رہا ہے۔

بھارتی فوج کے مطابق جمعے اور ہفتے کی درمیانی شب راجوری کے تارکنڈی فارورڈ ایریا کے قریب ایل او سی پر مشکوک نقل و حرکت دیکھی گئی، جس کے بعد مبینہ طور پر سرحد پار سے فائرنگ کی گئی۔

جموں میں تعینات بھارتی فوج کے ترجمان نے دعویٰ کیا کہ جمعے کی رات تقریباً 9 بج کر 50 منٹ پر کچھ مشکوک نقل و حرکت نظر آئی۔ ترجمان کے مطابق فوجی اہلکاروں کی جانب سے چیلنج کیے جانے پر "سرحد پار سے چھوٹے ہتھیاروں اور مارٹروں کے ذریعے بلااشتعال فائرنگ" شروع کی گئی۔

مقامی افراد کے مطابق فائرنگ کا تبادلہ رات تقریباً 10 بجے شروع ہوا اور ڈیڑھ گھنٹے تک جاری رہا، جس کے باعث سرحدی دیہات میں شدید خوف و ہراس پھیل گیا۔

بھارتی فوج کا کہنا ہے کہ واقعے کے بعد علاقے میں بڑے پیمانے پر سرچ آپریشن شروع کر دیا گیا ہے تاکہ کسی بھی ممکنہ دراندازی کی کوشش کو ناکام بنایا جا سکے۔ فوج کے مطابق وائٹ نائٹ کور کے اعلیٰ افسران صورتحال کی نگرانی کر رہے ہیں جبکہ سرحدی یونٹوں کو الرٹ رہنے کی ہدایت دی گئی ہے۔

پاکستان کی جانب سے اس واقعے پر تاحال کوئی باضابطہ بیان سامنے نہیں آیا۔

دفاعی ماہرین کے مطابق مئی 2025 میں پہلگام حملے کے بعد پاکستان اور بھارت کے درمیان چار روزہ فوجی جھڑپوں کے بعد ایل او سی پر مجموعی طور پر نسبتاً خاموشی رہی تھی۔ اگرچہ اس دوران معمولی نوعیت کے چند واقعات رپورٹ ہوئے، تاہم حالیہ فائرنگ کو ایک سال کے بعد سب سے اہم سرحدی واقعہ قرار دیا جا رہا ہے۔

سرحدی علاقے تارکنڈی کے رہائشیوں نے بتایا کہ فائرنگ کے دوران انہیں دوبارہ جنگ شروع ہونے کا خدشہ محسوس ہوا۔

ایک مقامی شہری محمد رشید کے مطابق رات کے وقت اچانک فائرنگ اور دھماکوں کی آوازوں سے پورا علاقہ گونج اٹھا۔ انہوں نے کہا کہ لوگ خوف کے باعث اپنے بچوں کے ساتھ گھروں کے اندرونی حصوں اور بنکروں میں چلے گئے۔

ایک اور مقامی خاتون زبیدہ بیگم نے بتایا کہ فائرنگ شروع ہوتے ہی علاقے میں بجلی منقطع ہو گئی اور بچے خوف کے باعث رونے لگے۔ ان کا کہنا تھا کہ سرحدی آبادیوں کو مسلسل خدشہ رہتا ہے کہ کشیدگی دوبارہ بڑھی تو فصلیں، مویشی اور شہری زندگی متاثر ہو سکتی ہے۔

حکام کے مطابق صورتحال پر نظر رکھی جا رہی ہے، جبکہ دونوں ممالک کے درمیان اس واقعے سے متعلق مزید ردعمل کا انتظار ہے۔