پاکستان سوڈان کو 1.5 ارب ڈالر مالیت کے ہتھیار اور جنگی طیارے فروخت کرے گا، رپورٹ

اسلام آباد (ڈیلی اردو/روئٹرز ) خبر رساں ادارے روئٹرز نے ذرائع کے حوالے سے رپورٹ کیا ہے کہ پاکستان سوڈان کو ہتھیار اور جنگی طیارے فراہم کرنے کے لیے 1.5 ارب ڈالر کے ایک معاہدے کے آخری مراحل میں ہے۔

پاکستانی فضائیہ کے ایک سابق اعلیٰ عہدیدار اور تین دیگر ذرائع نے بتایا کہ پاکستان سوڈان کو اسلحہ اور جیٹ طیارے فراہم کرنے کے لیے 1.5 ارب ڈالر کا معاہدہ کرنے کے قریب ہے۔ یہ معاہدہ سوڈانی فوج کے لیے ایک بڑی تقویت ثابت ہوگا، جو اس وقت نیم فوجی دستوں ’ریپڈ سپورٹ فورسز‘ (آر ایس ایف) کے خلاف برسرِ پیکار ہے۔

ان دونوں گروہوں کے درمیان ڈھائی سال سے جاری تنازعے نے دنیا کے بدترین انسانی بحران کو جنم دیا ہے، جس میں متعدد غیر ملکی مفادات شامل ہو چکے ہیں اور اس سے بحیرہ احمر کے اس اہم ملک کے بکھرنے کا خطرہ پیدا ہو گیا ہے۔

اس پیشرفت سے باخبر تین میں سے دو ذرائع نے نام ظاہر نہ کرنے کی شرط پر بتایا کہ  اس معاہدے کے تحت پاکستان سوڈانی فوج کو 10 قراقرم -8  ہلکے لڑاکا طیارے، جاسوسی اور حملوں کے لیے 200 سے زائد ڈرونز اور جدید فضائی دفاعی نظام مہیا کرے گا۔

پاک فضائیہ کے ریٹائرڈ ایئر مارشل عامر مسعود نے اسے ایک ’’حتمی معاہدہ‘‘ قرار دیا۔ انہوں نے اعداد و شمار یا فراہمی کا شیڈول بتائے بغیر مزید کہا کہ قراقرم -8  طیاروں کے علاوہ اس میں سپر مشاق تربیتی طیارے اور ممکنہ طور پر وہ جے ایف-17 لڑاکا طیارے بھی شامل ہیں، جو چینکے تعاون سے تیار کیے گئے ہیں۔

 روئٹرز کے مطابق پاکستانی فوج اور وزارتِ دفاع نے اس حوالے سے تبصرے کی درخواستوں کا فوری جواب نہیں دیا جبکہ سوڈانی فوج کے ترجمان نے بھی تاحال کوئی جواب نہیں دیا۔

پاکستان کی جانب سے ملنے والے سامان حرب، خاص طور پر ڈرونز اور طیارے، سوڈانی فوج کو فضائی برتری دوبارہ حاصل کرنے میں مدد دے سکتے ہیں، جو جنگ کے آغاز میں اسے حاصل تھی لیکن آر ایس ایف آر ایس ایف کی جانب سے ڈرونز کے بڑھتے ہوئے استعمال نے فوج کی پوزیشن  کمزور کر دی تھی۔ 

سوڈانی فوج آر ایس ایف پر متحدہ عرب امارات سے اسلحہ لینے کا الزام لگاتی ہے، تاہم یو اے ای نے اسلحہ فراہم کرنے کی تردید کی ہے۔۔