پاکستان کی وزارت داخلہ کو انڈیا میں بڑھتے اسلاموفوبیا پر گہری تشویش

اسلام آباد (ڈیلی اردو/اے پی پی) پاکستان کی وزارت داخلہ نے انڈیا میں اسلاموفوبیا کے بڑھتے واقعات پر گہری تشویش کا اظہار کرتے ہوئے کہا ہے کہ پاکستان انڈیا سے مطالبہ کرتا ہے کہ وہ اپنے تمام شہریوں کے حقوق اور تحفظ کا خیال رکھے۔

وزارت داخلہ کے ترجمان کی جانب سے جاری بیان میں کہا گیا ہے کہ انڈیا کو اپنے تمام شہریوں کے حقوق اور تحفظ کا خیال رکھنا چاہیے، اگرچہ ان کا تعلق کسی بھی مذہب سے ہو۔

بیان کے مطابق ’نفرت انگیز تقاریر، امتیازی کارروائیوں اور ریاستی مداخلت کے ذریعے مسلمانوں کو نشانہ بنانا بین الاقوامی برادری کے لیے سنگین تشویش کا باعث ہے۔‘

ترجمان وزارت داخلہ کے بیان میں یہ بھی کہا گیا کہ ’ایک ایسے وقت میں جب تحمل اور مفاہمت کی سب سے زیادہ ضرورت ہے، سیاسی یا نظریاتی مقاصد کے لیے مذہبی منافرت کو جان بوجھ کر بھڑکانا انسانی حقوق کی بین الاقوامی ذمہ داریوں کی خلاف ورزی کرتا ہے اور فرقہ وارانہ ہم آہنگی اور علاقائی استحکام کے امکانات کو نقصان پہنچاتا ہے۔‘