پاک افغان سرحد پر جھڑپ، گلستان سیکٹر میں متعدد افغان طالبان ہلاک

کوئٹہ(ڈیلی اردو) شورش زدہ صوبہ بلوچستان کے پاک افغان سرحدی علاقے گلستان سیکٹر میں پاکستانی حدود میں داخل ہونے کی مبینہ کوشش سیکیورٹی فورسز نے ناکام بنا دی، جوابی کارروائی میں متعدد افغان طالبان ہلاک ہونے کی اطلاع ہے۔

سیکیورٹی ذرائع کے مطابق افغانستان کی جانب سے مسلح افراد نے پاکستانی حدود میں داخل ہونے اور کارروائی کی کوشش کی، جس پر سیکیورٹی فورسز نے فوری طور پر جوابی کارروائی کی۔ ذرائع کا کہنا ہے کہ کارروائی کے نتیجے میں متعدد افغان طالبان ہلاک ہوئے۔

ذرائع کے مطابق فائرنگ کا سلسلہ وقفے وقفے سے جاری رہا، جبکہ سرحدی علاقے میں سیکیورٹی فورسز کو الرٹ کردیا گیا ہے۔ فورسز کی جانب سے سرحدی حدود کی نگرانی مزید سخت کرتے ہوئے کسی بھی ممکنہ دراندازی کی کوشش کا بروقت جواب دینے کے لیے اقدامات کیے گئے ہیں۔

یہ واقعہ پاک افغان سرحد پر بڑھتی ہوئی کشیدگی کے دوران پیش آیا ہے۔ حالیہ دنوں میں بھی سرحدی علاقوں میں دراندازی اور فائرنگ کے واقعات کی اطلاعات سامنے آتی رہی ہیں۔ 23 ستمبر کو پاکستانی سیکیورٹی ذرائع نے افغان سمت سے آنے والے 8 ڈرونز کو مار گرائے جانے کا دعویٰ کیا تھا، جبکہ کرم سیکٹر میں بھی دراندازی کی ایک کوشش ناکام بنانے کی اطلاع دی گئی تھی۔

سیکیورٹی ذرائع کا کہنا ہے کہ سرحدی علاقوں میں فورسز مکمل طور پر چوکس ہیں اور پاکستان کی حدود میں کسی بھی دراندازی یا مسلح کارروائی کا مؤثر جواب دینے کے لیے تیار ہیں۔