پشاور: حیات آباد میں یکے بعد دیگرے دھماکے

پشاور (ڈیلی اردو رپورت) پاکستان کے شورش زدہ صوبے خیبر پختون خوا کے صوبائی حکومت پشاور کے پوش علاقے حیات آباد فیز 6 میں نامعلوم ملزمان کی جانب سے گھروں کو نشانہ بنانے کے دو واقعات پیش آئے ہیں، جس کے بعد علاقے میں خوف و ہراس پھیل گیا۔

پولیس کے مطابق پہلے واقعے میں فیز 6 گلی نمبر 3 میں انجینئر شکیل خان کے گھر پر نامعلوم افراد نے بارودی مواد پھینکا، تاہم کوئی جانی یا مالی نقصان نہیں ہوا۔

دوسرے واقعے میں فیز 6 گلی نمبر 4 میں کوئلے کے کاروبار سے وابستہ شفیق آفریدی کے گھر کے باہر ایک ڈبے میں رکھا گیا بارودی مواد پھٹ گیا، جس کے نتیجے میں گھر کے مرکزی گیٹ کو جزوی نقصان پہنچا۔

اطلاع ملتے ہی ایس پی کینٹ عبد اللہ احسان، ایس ڈی پی او حیات آباد محمد جنید کھرل، ایس ایچ او تھانہ تاتارا ارشاد عمر اور بم ڈسپوزل یونٹ (بی ڈی یو) کی ٹیم موقع پر پہنچ گئی اور جائے وقوعہ کا تفصیلی معائنہ کیا۔ بی ڈی یو نے استعمال ہونے والے بارودی مواد کی تصدیق کر لی ہے جبکہ مختلف پہلوؤں سے تحقیقات کا آغاز کر دیا گیا ہے۔ پولیس کے مطابق ملزمان کی تلاش جاری ہے۔

ذرائع کا کہنا ہے کہ متاثرہ افراد پشاور کے ان درجنوں تاجروں، صنعتکاروں، ڈاکٹروں اور پراپرٹی ڈیلرز میں شامل ہیں جنہیں ماضی میں بھی بھتے کی کالز اور سنگین نتائج کی دھمکیاں موصول ہوتی رہی ہیں، اور حالیہ دنوں میں ایسی کالز دوبارہ موصول ہونے کی اطلاعات ہیں۔

پولیس حکام کے مطابق بھتہ خوری عموماً دہشت گرد تنظیموں کی جانب سے ان افراد کو نشانہ بنا کر کی جاتی ہے جن کے بارے میں سمجھا جاتا ہے کہ وہ مالی طور پر مستحکم ہیں۔ حکام کا کہنا ہے کہ ماضی میں شمالی، جنوبی وزیرستان، مہمند اور بنوں سے اس نوعیت کی رپورٹس سامنے آتی رہی ہیں، جبکہ پشاور اور گردونواح کے علاقوں میں بھی افغانستان کے کوڈ والے نمبرز سے بھتے کی کالز موصول ہونے کی شکایات ملتی رہی ہیں۔