پشاور : سکیورٹی فورسز اور دہشتگردوں میں فائرنگ،ایک دہشتگرد اور پولیس اہلکار ہلاک، 2 اہلکار زخمی

پشاور(ڈیلی اردو) خیبر پختونخوا کے شورش زدہ دارالحکومت پشاور کے علاقے گڑھی شیر داد میں سکیورٹی فورسز اور دہشتگردوں کے درمیان فائرنگ کے تبادلے میں ایک پولیس اہلکار ہلاک جبکہ دو دیگر اہلکار زخمی ہوگئے۔ کارروائی کے دوران ایک دہشتگرد بھی مارا گیا، جبکہ دیگر افراد موقع سے فرار ہونے میں کامیاب ہوگئے۔

سکیورٹی ذرائع کے مطابق علاقے میں دہشتگردوں کی موجودگی کی اطلاع پر کارروائی کی گئی، جس کے دوران فریقین کے درمیان فائرنگ کا تبادلہ ہوا۔ واقعے کے بعد ہلاک پولیس اہلکار، مارے گئے دہشتگرد اور زخمی اہلکاروں کو اسپتال منتقل کردیا گیا، جہاں زخمیوں کو طبی امداد فراہم کی گئی۔

ذرائع کے مطابق مارے گئے دہشتگرد کی شناخت کا عمل جاری ہے، جبکہ واقعے کے بعد سکیورٹی فورسز نے علاقے کو گھیرے میں لے کر فرار ہونے والے دہشتگردوں کی تلاش کے لیے سرچ آپریشن شروع کردیا ہے۔