پشین : اسلحے کی بڑی کھیپ برآمد، راکٹ لانچر گرینیڈز اور مشین گنز قبضے میں لے لی گئیں

کوئٹہ(ڈیلی اردو) بلوچستان کے شورش زدہ ضلع پشین میں سکیورٹی فورسز نے خفیہ اطلاع پر کارروائی کرتے ہوئے اسلحے اور گولہ بارود کی بھاری کھیپ برآمد کرلی۔ کارروائی سرانان کے علاقے میں ایک گودام پر کی گئی، جہاں اسلحے سے بھری گاڑی موجود تھی۔

سکیورٹی ذرائع کے مطابق آپریشن ردالفتنہ 3 کے تحت ایف سی بلوچستان اور دیگر سکیورٹی اہلکاروں نے مشترکہ کارروائی میں مبینہ طور پر افغانستان سے اسلحہ اور گولہ بارود منتقل کرنے کی کوشش ناکام بنائی۔ برآمد شدہ سامان میں 3 راکٹ پروپیلڈ گرینیڈز، 4 لائٹ مشین گنز، ایک مشین گن، دستی بم، راکٹس اور بڑی مقدار میں گولہ بارود شامل ہے۔

ذرائع کا کہنا ہے کہ اسلحے کی برآمدگی کے بعد علاقے میں ممکنہ طور پر موجود دہشتگردوں کی تلاش کے لیے سرچ آپریشن جاری ہے، جبکہ اسلحے کی ترسیل کے منصوبے اور اس میں ملوث عناصر کے بارے میں تحقیقات کی جا رہی ہیں۔