پنجاب میں سی ٹی ڈی کی کارروائیاں، 18 دہشتگرد گرفتار

لاہور(ڈیلی اردو) پنجاب کے مختلف اضلاع میں محکمہ انسداد دہشتگردی (سی ٹی ڈی) نے انٹیلی جنس اطلاعات کی بنیاد پر 117 کارروائیاں کرتے ہوئے 18 دہشتگردوں کو گرفتار کرنے کا دعویٰ کیا ہے۔

سی ٹی ڈی ترجمان کے مطابق کارروائیاں لاہور، فیصل آباد، بھکر، ساہیوال، حافظ آباد، گوجرانوالہ اور ملتان میں کی گئیں۔ گرفتار افراد کے قبضے سے اسلحہ اور دھماکا خیز مواد سے متعلق سامان برآمد کیا گیا۔

ترجمان کے مطابق برآمد ہونے والے سامان میں 8 ڈیٹونیٹر، 5 فٹ پرائمہ کارڈ اور 13 فٹ حفاظتی فیوز وائر بھی شامل ہیں۔ گرفتار افراد میں حسن عباس، حنیف، سمیع اللہ، حسنین، عطا اور شہزاد سمیت دیگر افراد شامل ہیں۔

سی ٹی ڈی کے مطابق گرفتار کیے گئے افراد پر شہریوں میں خوف و ہراس پھیلانے کی منصوبہ بندی کا الزام ہے۔

ترجمان نے بتایا کہ رواں ہفتے صوبے میں 3 ہزار 357 کومبنگ آپریشنز بھی کیے گئے، جن کے دوران 274 مشتبہ افراد کو حراست میں لیا گیا، جبکہ ایک لاکھ 21 ہزار 433 افراد سے پوچھ گچھ کی گئی۔

سی ٹی ڈی کے مطابق صوبے میں دہشتگردی کے خطرات کی روک تھام اور امن و امان کے تحفظ کے لیے کارروائیوں کا سلسلہ جاری ہے۔