پولینڈ میں وزیراعظم اور وزیر دفاع کو ممکنہ حملے کا خطرہ، سکیورٹی اداروں کا ہنگامی اجلاس طلب

وارسا(ڈیلی اردو) پولینڈ میں وزیراعظم ڈونلڈ ٹسک اور وزیر دفاع ولادیسواف کوسینیاک کامیش کو ممکنہ حملے کا نشانہ بنانے سے متعلق اطلاعات موصول ہونے کے بعد سکیورٹی اداروں کو ہائی الرٹ کر دیا گیا ہے، جبکہ صورتحال کا جائزہ لینے کے لیے پولیس اور متعلقہ حکام کا ہنگامی اجلاس طلب کر لیا گیا۔

عرب میڈیا کے مطابق پولینڈ کی وزارت داخلہ کی ترجمان کارولینا گالیٹسکا نے بتایا کہ اتوار کو پولیس، سکیورٹی اداروں اور وزارت داخلہ کے نمائندوں کا اجلاس منعقد کیا جانا تھا، جس میں ممکنہ خطرے اور حفاظتی اقدامات پر غور کیا جائے گا۔ تاہم، مبینہ منصوبے کی نوعیت، اس کے پیچھے موجود افراد یا خطرے کی شدت سے متعلق مزید تفصیلات فوری طور پر سامنے نہیں آئیں۔

یہ پیش رفت ایسے وقت میں سامنے آئی ہے جب پولینڈ میں حالیہ دنوں کے دوران وسطی علاقے مازوویا میں چار روز کے اندر تین اسکولوں کو نشانہ بنانے کے واقعات رپورٹ ہوئے، جس کے بعد حکام نے سکیورٹی انتظامات سخت کر دیے۔

پولینڈ کے وزیراعظم ڈونلڈ ٹسک نے ستمبر میں نیٹو کی مشرقی سرحد پر روس کی جانب سے ممکنہ ہائبرڈ حملوں کے خطرے سے بھی خبردار کیا تھا۔ تاہم، موجودہ اطلاعات میں وزیراعظم اور وزیر دفاع کو لاحق ممکنہ خطرے کا روس سے کوئی براہ راست تعلق ثابت نہیں کیا گیا۔