پیوٹن نے ٹرمپ کو ایران کا جنگ کے خاتمے سے متعلق مؤقف پہنچا دیا، افزودہ یورینیم روس منتقل کرنے کی پیشکش برقرار

ماسکو(ڈیلی اردو) روسی صدر ولادیمیر پیوٹن نے امریکی صدر ڈونلڈ ٹرمپ سے ٹیلی فونک گفتگو کے دوران ایران کے ساتھ جاری تنازع ختم کرنے کے ممکنہ حل سے متعلق تہران کا مؤقف پیش کیا ہے۔ روسی خبر رساں ادارے انٹرفیکس کے مطابق یہ پیغام ایرانی صدر مسعود پزشکیان کی مشاورت سے امریکی صدر تک پہنچایا گیا۔

روسی حکام کے مطابق دونوں صدور کے درمیان تقریباً ڈیڑھ گھنٹے جاری رہنے والی گفتگو میں ایران کے افزودہ یورینیم کا معاملہ بھی زیر بحث آیا۔ پیوٹن نے ٹرمپ کو بتایا کہ ایران کا افزودہ یورینیم روس منتقل کرنے کی ماسکو کی پیشکش اب بھی موجود ہے، جسے تنازع کے سفارتی حل کی کوششوں میں اہم پیش رفت کے طور پر دیکھا جا رہا ہے۔

روسی صدر کے معاون یوری اوشاکوف کے مطابق پیوٹن نے زور دیا کہ ایران کے جوہری معاملے پر سفارتی راستے ابھی ختم نہیں ہوئے اور تہران کے ساتھ مذاکرات کے ذریعے معاہدہ ممکن ہے۔ ماسکو اس سے پہلے بھی ایران کا افزودہ یورینیم روس منتقل کرنے کی تجویز دے چکا ہے۔

روسی خبر رساں ادارے تاس کے مطابق گفتگو خوشگوار ماحول میں ہوئی۔ دونوں رہنماؤں نے روس اور امریکا کے درمیان رابطوں کے تسلسل پر اطمینان کا اظہار کیا۔ بات چیت میں یوکرین جنگ بھی زیر بحث آئی، جہاں پیوٹن نے روس کے مؤقف کو برقرار رکھنے اور تنازع کے سیاسی و سفارتی حل کے لیے آمادگی کا اظہار کیا۔

روسی حکام کے مطابق یوکرین کے ساتھ سہ فریقی مذاکرات دوبارہ شروع کرنے کے امکان پر بھی تبادلہ خیال ہوا، تاہم ان مذاکرات کی بحالی کے لیے کوئی حتمی تاریخ طے نہیں کی گئی۔ رپورٹ میں یہ بھی بتایا گیا کہ پیوٹن اور ٹرمپ آئندہ چین میں ہونے والے ایشیا پیسیفک اقتصادی تعاون کے سربراہی اجلاس میں شرکت کا ارادہ رکھتے ہیں، جہاں دونوں رہنماؤں کی ملاقات کا امکان موجود ہے۔