چینی وزیر خارجہ کی پاکستانی فیلڈ مارشل عاصم منیر سے ملاقات، دہشت گردی کے امور پر تبادلہ خیال

اسلام آباد (ڈیلی اردو) چین کے وزیر خارجہ وانگ ژی نے پاکستانی فوج کے سربراہ فیلڈ مارشل عاصم منیر سے ملاقات کی ہے، جس میں علاقائی سلامتی، دہشت گردی کے خلاف تعاون اور باہمی دلچسپی کے امور پر تبادلہ خیال کیا گیا۔

پاکستانی فوج کے شعبہ تعلقات عامہ (آئی ایس پی آر) کے مطابق ملاقات کے دوران دونوں ممالک کے درمیان سٹریٹجک شراکت داری کو مزید مستحکم بنانے اور علاقائی و عالمی فورمز پر تعاون بڑھانے پر اتفاق کیا گیا۔

آئی ایس پی آر کے مطابق چینی وزیر خارجہ نے پاکستان کی خودمختاری، سلامتی اور ترقی کے لیے چین کی غیر متزلزل حمایت کا یقین دلایا۔ اس موقع پر فیلڈ مارشل عاصم منیر نے چین کے مستقل تعاون پر شکریہ ادا کیا اور کہا کہ پاکستان خطے میں امن، استحکام اور خوشحالی کو فروغ دینے کے لیے پرعزم ہے۔

واضح رہے کہ چینی وزیر خارجہ وانگ ژی ان دنوں پاکستان کے دورے پر ہیں۔ وہ اس سے قبل نئی دہلی میں بھارتی وزیر اعظم نریندر مودی سے ملاقات کے بعد اسلام آباد پہنچے تھے۔ گزشتہ روز انہوں نے وزیراعظم شہباز شریف سے بھی اعلیٰ سطحی وفد کے ہمراہ ملاقات کی تھی۔

اسلام آباد میں اپنے پاکستانی ہم منصب اسحاق ڈار کے ساتھ مشترکہ پریس بریفنگ میں وانگ ژی نے کہا تھا کہ چین کی بھارت کے ساتھ شراکت داری کسی تیسرے ملک کے خلاف نہیں ہے اور نہ ہی کسی دوسرے ملک پر اس کا اثر پڑے گا۔