ڈیرہ اسماعیل خان میں آپریشن، شیعہ ٹارگٹ کلنگ میں ملوث لشکر جھنگوی کے 2 دہشتگرد ہلاک

ڈی آئی  خان (نمائندہ ڈیلی اردو ) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں پولیس اور سی ٹی ڈی کی مشترکہ کارروائی میں پولیس جوانوں، اہل تشیع اکابرین سمیت ٹارگٹ کلنگ کے متعدد مقدمات میں مطلوب 2 دہشت گرد ہلاک کر دیے گئے۔

ڈسٹرکٹ پولیس آفیسر ڈیرہ سجاد احمد صاحبزادہ نے پولیس کمانڈ اینڈ کنٹرول سنٹر میں ایس پی سی ٹی ڈی افتخار علی شاہ، ایس پی سٹی علی حمزہ، ڈی ایس پی سٹی محمد عدنان اور ڈی ایس پی پروآ سردار عالمگیر خان کے ہمراہ پریس کانفرنس کرتے ہوئے بتایا کہ سی ٹی ڈی اور ڈیرہ پولیس نے خفیہ اطلاع پر تھانہ پروآ کی حدود میں سکندر روڈ نزد ڈرین دیہہ بھڑکی میں کامیاب انٹیلی جنس بیسڈ آپریشن کیا۔

ڈی پی او کے مطابق آپریشن کے دوران کالعدم تنظیم لشکر جھنگوی (بالی کھیارہ گروپ) کے دو دہشت گرد ہلاک ہوئے، جن کی شناخت رشید ولد عالم شیر سکنہ چھجڑی اور رفیع الدین ولد عبدالرحمان سکنہ لاڑ ماہڑہ کے ناموں سے ہوئی۔

ہلاک دہشت گردوں کے قبضے سے بھاری اسلحہ و بارود برآمد ہوا، جن میں ایک کلاشنکوف، تین میگزین، 55 کارتوس 7.62 بور، دو دستی بم، ایک راکٹ لانچر، چار راکٹ شیل اور چار راکٹ بوسٹر شامل ہیں۔

ڈی پی او نے بتایا کہ ہلاک دہشت گرد پولیس اہلکاروں، اہل تشیع اکابرین کی ٹارگٹ کلنگ اور سکیورٹی فورسز پر حملوں کے متعدد مقدمات میں مطلوب تھے۔