ڈیرہ غازی خان میں سی ٹی ڈی اور پولیس کا مشترکہ آپریشن، 2 دہشت گرد ہلاک

ڈی جی خان (ڈیلی اردو) سی ٹی ڈی اور ڈی جی خان پولیس کی مشترکہ کارروائی، دہشت گردوں کے عزائم خاک میں ملا دیئے گئے، کارروائی کے دوران 2 دہشت گرد ہلاک ہو گئے۔

ترجمان پنجاب پولیس کے مطابق تھانہ وہوا کے علاقے کوٹانی تال میں دہشت گردوں نے پولیس پر ہینڈ گرنیڈ اور بھاری اسلحے سے حملہ کیا، سی ٹی ڈی اور ڈی جی خان پولیس ٹیموں کی جوابی کارروائی میں 2 دہشت گرد ہلاک ہو گئے۔

پنجاب خیبرپختونخوا بارڈر کے قریب دہشت گردوں کی نقل و حرکت کے پیش نظر پولیس ہائی الرٹ تھی، خوارجی دہشت گردوں کے خلاف آپریشن کی مکمل کمانڈ آر پی او ڈیرہ غازی خان کیپٹن (ر) سجاد حسن خان نے کی، اطلاع ملتے ہی ڈی پی او ڈیرہ غازی خان سید علی فوری موقع پر پہنچے۔

ترجمان پنجاب پولیس کے مطابق دہشت گرد پنجاب کے تھانوں اور حساس مقامات پر حملے کی منصوبہ بندی کر رہے تھے، دہشت گردوں کی اطلاع ملتے ہی ایس ایچ او وہوا، پولیس اور سی ٹی ڈی ٹیموں نے دہشت گردوں کا تعاقب کیا۔

پولیس اور سی ٹی ڈی ٹیموں کو دیکھتے ہی دہشت گرد راکٹ، گرینیڈ اور دیگر بھاری اسلحہ سے حملہ آور ہوئے، دہشتگردوں کی شدید فائرنگ کے باوجود پولیس نے جوانمردی سے بھرپور جوابی کارروائی کی۔

ترجمان پنجاب پولیس کے مطابق ایلیٹ فورس سمیت بیک اَپ ٹیمیں فوری موقع پر پہنچیں، دہشتگردوں کو پسپائی کا موقع نہ دیا، مقابلے کے دوران دو خوارجی دہشتگرد موقع پر ہی ہلاک کر دیئے گئے، دہشت گردوں سے راکٹ لانچرز، ہینڈ گرینیڈ و دیگر جدید و بھاری اسلحہ برآمد ہوا۔

آئی جی پنجاب ڈاکٹر عثمان انور نے خوارجی دہشت گردوں کو جہنم واصل کرنے پر سی ٹی ڈی اور ڈی جی خان پولیس کو شاباش دی، پولیس، سی ٹی ڈی اور ایلیٹ ٹیموں نے سرحدی علاقے میں سرچ اور سویپ آپریشن شروع کر دیا۔