کرم: چیک پوسٹ پر حملہ، ایک اہلکار ہلاک، میجر اور کیپٹن سمیت 8 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع کرم میں واقع خشکرام چیک پوسٹ پر دہشت گردوں کے حملے میں ایک سیکیورٹی اہلکار ہلاک جبکہ میجر دانیال اور کیپٹن یحییٰ سمیت 8 اہلکار زخمی ہو گئے ہیں۔

حکام کے مطابق زخمیوں میں فوج کے دو افسران بھی شامل ہیں جبکہ ایک زخمی اہلکار کی حالت تشویشناک بتائی جا رہی ہے۔ واقعے کے بعد سیکیورٹی فورسز نے علاقے میں سرچ آپریشن شروع کر دیا ہے۔

صدہ میں پولیس اسٹیشن پر دستی بم حملہ

دوسری جانب کرم کے علاقے صدہ میں پولیس سٹیشن پر نامعلوم افراد نے دستی بم حملہ کیا۔

پولیس ذرائع کے مطابق حملہ آوروں کی جانب سے پھینکا گیا دستی بم زور دار دھماکے سے پھٹا تاہم واقعے میں کسی جانی نقصان کی اطلاع نہیں ملی۔

پولیس نے جائے وقوعہ سے شواہد اکٹھے کر کے واقعے کی تحقیقات شروع کر دی ہیں جبکہ حملہ آوروں کی تلاش جاری ہے۔