کشمیر میں بھارتی فوج پر کِشتواڑ پولیس اسٹیشن پر حملے کا مقدمہ درج، اعلیٰ فوجی افسران نامزد

سرینگر (ڈیلی اردو/نیوز ایجنسی ) انڈیا کے زیرِ انتظام کشمیر کے ضلع کِشتواڑ میں بھارتی فوج اور جموں و کشمیر پولیس کے درمیان پیش آنے والے ایک غیر معمولی واقعے نے سکیورٹی اداروں کے باہمی تعلقات، اختیارات اور قانون کی عملداری پر نئے سوالات کھڑے کر دیے ہیں۔ 

جموں و کشمیر پولیس نے بھارتی فوج کی 17 راشٹریہ رائفلز کے کمانڈنگ آفیسر، ایک میجر، ایک نائب صوبیدار اور درجنوں فوجی اہلکاروں کے خلاف پولیس اسٹیشن پر مبینہ حملے، سرکاری اہلکاروں پر تشدد اور سرکاری املاک کو نقصان پہنچانے کے الزام میں مقدمہ درج کر لیا ہے۔

پولیس کے مطابق ایف آئی آر نمبر 17/2026 اتھولی پولیس اسٹیشن میں درج کی گئی، جس میں الزام عائد کیا گیا ہے کہ واقعہ پہلے سے منصوبہ بند تھا۔ ایف آئی آر کے مطابق کجئی گاؤں میں قائم 17 راشٹریہ رائفلز کے کیمپ سے تقریباً 30 سے 40 فوجی اہلکار، اعلیٰ افسران کی قیادت میں، اتھولی پولیس اسٹیشن پہنچے اور دیواریں پھلانگ کر تھانے میں داخل ہوئے۔

پولیس کا کہنا ہے کہ فوجی اہلکار لاٹھیوں، لوہے کی سلاخوں اور سرکاری ہتھیاروں سے لیس تھے۔ الزام ہے کہ انہوں نے تھانے میں موجود پولیس اہلکاروں اور محکمہ ٹرانسپورٹ کے ایک سینئر افسر سمیت ان کے سکیورٹی عملے پر تشدد کیا، جبکہ پولیس اسٹیشن کے مرکزی گیٹ اور باہر کھڑی سرکاری گاڑیوں کو بھی نقصان پہنچایا۔

پولیس ذرائع کے مطابق واقعے کی ابتدا ایک معمولی تنازع سے ہوئی، جب مبینہ طور پر ایک فوجی گاڑی کو روکے جانے پر کشیدگی پیدا ہوئی، جو بعد ازاں تصادم میں تبدیل ہو گئی۔

دوسری جانب بھارتی فوج کے جموں میں تعینات ترجمان لیفٹیننٹ کرنل سنیل برتوال نے واقعے کے بعد بیان جاری کرتے ہوئے کہا کہ معاملے کی اعلیٰ سطح پر مشترکہ تحقیقات شروع کر دی گئی ہیں، جن میں فوج اور پولیس دونوں کے افسران شامل ہوں گے۔ انہوں نے کہا کہ فوج قانونی کارروائی میں مکمل تعاون کرے گی۔

یہ پہلا موقع نہیں کہ مقبوضہ کشمیر میں پولیس اور بھارتی فوج یا نیم فوجی دستوں کے درمیان اس نوعیت کا تنازع سامنے آیا ہو۔ جنوری 2018 میں شوپیاں کے گنوپورہ گاؤں میں فوجی فائرنگ سے تین شہریوں کی ہلاکت کے بعد جموں و کشمیر پولیس نے 10 گڑھوال رائفلز کے اہلکاروں اور میجر آدتیہ کے خلاف قتل اور اقدامِ قتل کا مقدمہ درج کیا تھا، تاہم بعد میں سپریم کورٹ نے اس تحقیقات پر روک لگا دی تھی۔

اسی طرح 2017 میں گاندربل میں امرناتھ یاترا ڈیوٹی کے دوران مقامی پولیس اور فوجی اہلکاروں کے درمیان بھی تصادم ہوا تھا، جہاں پولیس نے فوجیوں پر چوکی پر حملے اور اہلکاروں کو تشدد کا نشانہ بنانے کا الزام عائد کیا تھا۔

انسانی حقوق کے ماہرین اور سکیورٹی امور کے تجزیہ کاروں کے مطابق ماضی میں جب بھی فوجی اہلکاروں کے خلاف مقدمات درج ہوئے، آرمڈ فورسز اسپیشل پاورز ایکٹ (AFSPA) کے تحت حاصل قانونی استثنیٰ کے باعث انہیں منطقی انجام تک پہنچانا مشکل ثابت ہوا۔ اس قانون کے تحت کسی فوجی اہلکار کے خلاف عام عدالت میں مقدمہ چلانے کے لیے بھارتی وزارت دفاع کی پیشگی منظوری ضروری ہوتی ہے، جو شاذ و نادر ہی دی جاتی ہے۔

ماہرین کے مطابق موجودہ کِشتواڑ واقعہ اس لحاظ سے مختلف ہے کہ اس میں متاثرہ فریق عام شہری نہیں بلکہ خود ریاست کا قانون نافذ کرنے والا ادارہ یعنی پولیس ہے۔ بھارتی قوانین کے تحت دورانِ ڈیوٹی کسی سرکاری اہلکار پر حملہ ایک سنگین جرم تصور کیا جاتا ہے، جس کے باعث اس مقدمے کی پیش رفت پر بھی گہری نظر رکھی جا رہی ہے۔