یمن : لحج کے ساحل پر حوثی میزائل حملہ، متعدد ہلاک و زخمی

صنعاء(ڈیلی اردو) یمن کے صوبہ لحج کے ساحلی علاقے خور عمیرہ میں مبینہ حوثی باغیوں کے بیلسٹک میزائل حملے کے نتیجے میں سرکاری فورسز کے متعدد اہلکاروں کے ہلاک اور زخمی ہونے کی اطلاعات ہیں۔

مقامی ذرائع کے مطابق میزائل قومی ڈھال فورسز کے اہلکاروں کے ایک اجتماع کے قریب گرا، جس کے باعث جانی نقصان ہوا۔ یہ فورسز تعز اور لحج کی سرحدی پٹی اور باب المندب سے متصل پہاڑی علاقوں میں جاری جھڑپوں کے تناظر میں خور عمیرہ میں تعینات ہیں۔

میدانی ذرائع کا کہنا ہے کہ حوثی جنگجوؤں نے پیر کے روز لحج کے ضلع المضاربہ و رأس العارہ سے متصل ایک پہاڑی سلسلے پر بھی پیش قدمی کی۔ ذرائع کے مطابق گزشتہ 24 گھنٹوں کے دوران جھڑپوں اور فضائی حملوں میں مجموعی طور پر 97 افراد ہلاک ہوئے، جن میں 65 حوثی جنگجو جبکہ 32 سرکاری فورسز اور قبائلی عناصر شامل ہیں۔

تعز کے جنوب اور مغرب میں ستمبر کے آغاز سے لڑائی جاری ہے، جس کے دوران محاذ لحج کے علاقوں تک پھیل گیا ہے اور فریقین کے درمیان فضائی و توپ خانے سے حملوں کا تبادلہ بھی جاری ہے۔

دوسری جانب عالمی ادارہ برائے مہاجرت کے مطابق یمن کے آٹھ صوبوں میں حالیہ کشیدگی کے باعث بے گھر ہونے والے افراد کی مجموعی تعداد ایک لاکھ 45 ہزار 308 تک پہنچ گئی ہے، جو 24 ہزار 218 خاندانوں کے برابر ہے۔ 21 ستمبر کے مقابلے میں بے گھر افراد کی تعداد میں 15 ہزار 870 کا اضافہ ہوا ہے۔