بلوچستان: کوئٹہ میں دھماکا، ایک شخص ہلاک، 4 زخمی

کوئٹہ (نمائندہ ڈیلی اردو/بی بی سی)پاکستان کے صوبے بلوچستان کے دارالحکومت کوئٹہ میں بم دھماکے کے ایک واقعے میں ایک شخص ہلاک اور چار زخمی ہو گئے ہیں۔

دھماکہ شہر میں اتوار کی شب مغربی بائی پاس کے ساتھ بروری روڈ کے آخری سٹاپ ہوا۔

ایس ایچ او بروری پولیس سٹیشن محمود خروٹی نے بتایا کہ دھماکے سے ایک ہنڈا سوک کار متاثر ہوئی۔ انھوں نے بتایا کہ دھماکے سے کار میں سوار ایک شخص ہلاک اور دوسرا زخمی ہوا جبکہ دھماکے سے تین راہگیر بھی زخمی ہوئے۔

ایک اور پولیس اہلکار نے نام ظاہر نہ کرنے کی شرط پر بتایا کہ دھماکہ مقناطیسی بم پھٹنے کی وجہ سے ہوا جوکہ کار میں ڈرائیور کی سائیڈ پر چپکایا گیا تھا۔

اہلکار کے مطابق ہلاک ہونے والے شخص کی شناخت قلات سے تعلق رکھنے والے حسین علی محمد حسنی کے نام سے ہوئی جبکہ گاڑی میں سوار ان کا ساتھی نبیل زخمی ہوا ہے۔

گزشتہ 24 گھنٹوں کے دوران کوئٹہ میں یہ دوسرا بم دھماکہ تھا۔ گزشتہ روز کوئٹہ شہر کے نواحی علاقے ہنہ میں کلی منگلا کے قریب بم دھماکے کے ایک واقعے میں دو بھائی ہلاک اور سات افراد زخمی ہوئے تھے۔