آبنائے ہرمز اور جزیرہ قشم کے قریب تین دھماکوں کی آوازیں، ایرانی حکام خاموش

تہران (ڈیلی اردو/نیوز ایجنسیاں) ایران کے سرکاری خبر رساں ادارے مہر نیوز ایجنسی کے مطابق پیر اور منگل کی درمیانی شب آبنائے ہرمز اور جزیرہ قشم کے قریب تین دھماکوں کی آوازیں سنی گئی ہیں۔

رپورٹ کے مطابق پہلے دو دھماکے پیر کی رات دیر گئے جبکہ تیسرا دھماکہ منگل کی صبح سنا گیا۔ مہر نیوز ایجنسی کے نمائندے کا کہنا ہے کہ دھماکے آبنائے ہرمز کے علاقے میں ہوئے اور ان کا مقصد ممکنہ طور پر وہاں سے گزرنے والی بحری ٹریفک کو کنٹرول کرنا تھا۔

ایرانی میڈیا کے مطابق قشم جزیرے کے جنوبی علاقے کے قریب دھماکوں کی آوازیں سننے میں آئیں، تاہم ان کی نوعیت اور مقام کے بارے میں مزید تفصیلات سامنے نہیں آ سکیں۔

رپورٹس میں کہا گیا ہے کہ دھماکوں کا تعلق ممکنہ طور پر ٹریفک مینجمنٹ یا بحری سرگرمیوں سے ہو سکتا ہے، تاہم اس حوالے سے کوئی باضابطہ تصدیق نہیں کی گئی۔

تاحال ایرانی حکام، پاسدارانِ انقلاب یا دیگر سرکاری اداروں کی جانب سے دھماکوں کے بارے میں کوئی سرکاری بیان جاری نہیں کیا گیا، جس کے باعث واقعے کی نوعیت اور وجوہات کے حوالے سے صورتحال غیر واضح ہے۔

آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں سے عالمی تیل تجارت کا بڑا حصہ گزرتا ہے، اس لیے اس علاقے میں کسی بھی غیر معمولی سرگرمی کو بین الاقوامی سطح پر اہمیت دی جاتی ہے۔