آبنائے ہرمز میں برطانوی پرچم بردار آئل ٹینکر پر ڈرون حملہ، 2 اہلکار زخمی

تہران(ڈیلی اردو) آبنائے ہرمز میں برطانوی پرچم بردار آئل ٹینکر کو ڈرون حملے میں نشانہ بنایا گیا، جس کے نتیجے میں جہاز کے عملے کے دو ارکان معمولی زخمی ہوگئے۔

برطانوی میری ٹائم سکیورٹی حکام کے مطابق آئل ٹینکر ’لا سٹیفنی‘ خلیج فارس کی جانب سفر کر رہا تھا کہ آبنائے ہرمز کے قریب اسے ڈرون حملے کا نشانہ بنایا گیا۔ اس سے قبل اطلاعات سامنے آئی تھیں کہ اسی علاقے میں ایک آئل ٹینکر کو نامعلوم پروجیکٹائل سے بھی نشانہ بنایا گیا تھا۔

حکام کا کہنا ہے کہ ڈرون حملے کے نتیجے میں ٹینکر پر موجود دو افراد کو معمولی نوعیت کی چوٹیں آئیں، تاہم جہاز کو شدید نقصان پہنچنے کی کوئی اطلاع سامنے نہیں آئی۔

برطانوی میری ٹائم ٹریڈ آپریشنز کے مطابق واقعے کے بعد ٹینکر نے اپنا سفر جاری رکھا اور اب اپنی اگلی بندرگاہ کی جانب بڑھ رہا ہے۔ حملے کے ذمہ داروں سے متعلق فوری طور پر کوئی حتمی دعویٰ سامنے نہیں آیا۔