اسرائیل پر غزہ میں فلسطینی بچوں کیخلاف نسل کشی کا الزام، اقوام متحدہ کی نئی رپورٹ

نیو یارک (ڈیلی اردو) اقوام متحدہ کے ایک آزاد تحقیقاتی کمیشن نے اپنی تازہ رپورٹ میں الزام عائد کیا ہے کہ اسرائیلی حکام اور سکیورٹی فورسز نے غزہ پٹی میں فلسطینی بچوں کو دانستہ طور پر نشانہ بنایا، جس کے نتیجے میں’’ نسل کشی، انسانیت کے خلاف جرائم اور جنگی جرائم‘‘ کا ارتکاب ہوا، جبکہ مقبوضہ مغربی کنارے میں بھی جنگی جرائم کے شواہد سامنے آئے ہیں۔

یہ رپورٹ اقوام متحدہ کے ’’آزاد بین الاقوامی تحقیقاتی کمیشن برائے مقبوضہ فلسطینی علاقے، مشرقی یروشلم اور اسرائیل‘‘ کی جانب سے جاری کی گئی، جس میں 7 اکتوبر 2023 کو اسرائیل اور حماس کے درمیان جنگ کے آغاز کے بعد فلسطینی بچوں کے خلاف ہونے والی مبینہ خلاف ورزیوں کا جائزہ لیا گیا ہے۔

رپورٹ کے مطابق غزہ پٹی کی جنگ میں ہلاک ہونے والوں میں سے تقریباً 30 فیصد بچے تھے، جو تنازعے کے انسانی اثرات کی سنگینی کو ظاہر کرتا ہے۔

کمیشن کی گزشتہ سال ستمبر میں جاری ہونے والی ایک رپورٹ میں بھی یہ الزام لگایا گیا تھا کہ اسرائیل نے غزہ پٹی میں ’’نسل کشی کا ارتکاب‘‘ کیا، جبکہ اسرائیلی وزیر اعظم بینجمن نیتن یاہو سمیت اعلیٰ اسرائیلی عہدیداروں پر ان اقدامات کی حوصلہ افزائی کرنے کا الزام بھی عائد کیا گیا تھا۔

اسرائیل نے ان الزامات کو مسترد کرتے ہوئے انہیں ’شرمناک‘ اور’بے بنیاد‘ قرار دیا تھا۔

جنیوا میں اسرائیل کے سفارتی مشن نے منگل کو جاری کردہ ایک بیان میں کہا کہ اسرائیل اس کمیشن کی تازہ رپورٹ کو مسترد کرتا ہے، جسے اس نے ’’دوسری ہتک آمیز اور جانبدارانہ رپورٹ‘‘ قرار دیا۔

بیان میں کہا گیا، ’’اسرائیل اس بہتان پر مبنی ڈرامے کو مکمل طور پر مسترد کرتا ہے۔‘‘

اسرائیلی مشن نے مزید کہا، ’’ہر بچے کو تحفظ کا حق حاصل ہے‘‘ اور دعویٰ کیا کہ رپورٹ میں حماس کی ’’سفاکانہ پالیسیوں‘‘ کو نظر انداز کیا گیا ہے۔