اسرائیل کے ایران میں اہم عسکری اہداف پر فضائی حملے

یروشلم (ڈیلی اردو) اسرائیل نے کہا ہے کہ اس کی فضائیہ نے ایران کے مغربی اور وسطی علاقوں میں عسکری اہداف کو نشانہ بنایا ہے۔

اسرائیلی فوج (آئی ڈی ایف) کے مطابق فضائی کارروائی کے دوران ایران کے مختلف فوجی اہداف پر حملے کیے گئے۔ تاہم حملوں کے مقامات، نقصانات یا ممکنہ جانی نقصان کے بارے میں مزید تفصیلات جاری نہیں کی گئیں۔

یہ کارروائی ایسے وقت میں سامنے آئی ہے جب اپریل میں ایران اور امریکہ کے درمیان جنگ بندی کے بعد گزشتہ روز ایران کی جانب سے اسرائیل پر میزائل حملے کیے گئے تھے، جس کے بعد خطے میں کشیدگی ایک بار پھر بڑھ گئی ہے۔

دوسری جانب امریکی صدر ڈونلڈ ٹرمپ نے ایران پر زور دیا ہے کہ وہ مذاکرات کی میز پر واپس آئے اور معاہدے کے عمل کو آگے بڑھائے۔

امریکی ٹیلی ویژن نیٹ ورک فاکس نیوز کو دیے گئے انٹرویو میں صدر ٹرمپ نے کہا، ’’ایران نے اپنے میزائل داغ دیے ہیں، یہ کافی ہے۔ اب مذاکرات کی میز پر واپس آئیں اور معاہدہ کریں۔‘‘

خطے میں حالیہ فوجی کارروائیوں اور بیانات کے بعد صورتحال بدستور کشیدہ ہے جبکہ عالمی برادری دونوں فریقوں سے تحمل کا مظاہرہ کرنے کا مطالبہ کر رہی ہے۔