اسرائیل کے لبنان میں 80 سے زائد اہداف پر حملے، حزب اللہ کے درجنوں ارکان ہلاک

یروشلم (ڈیلی اردو/اے ایف پی) اسرائیلی فوج نے جمعہ 19 جون کے روز دعویٰ کیا کہ اس نے ہمسایہ ملک لبنان میں گزشتہ رات اور آج جمعے کی صبح بھی 80 سے زائد ایسے اہداف کو نشانہ بنایا، جو حزب اللہ کے ’دہشت گردانہ ڈھانچوں‘ کا حصہ تھے اور ان کارروائیوں میں اس ایران نواز لبنانی شیعہ ملیشیا کے ’درجنوں‘ ارکان کو ہلاک کر دیا گیا۔

نیوز ایجنسی اے ایف پی کی رپورٹوں کے مطابق اسرائیلی فوج نے مزید بتایا کہ اس نےحزب اللہ کے ٹھکانوں پر یہ حملے اس مسلح تنظیم کے عسکریت پسندوں کی طرف سے لبنان جنگ میں فائر بندی ڈیل کی خلاف ورزیوں کے جواب میں کیے۔

اسرائیل کی دفاعی افواج (آئی ڈی ایف) کی طرف سے جاری کردہ ایک بیان میں کہا گیا، ’’گزشتہ رات آئی ڈی ایف نے  جنوبی لبنان میں نبطیہ کے علاقے اور سکیورٹی زون کے اندر اور اس سے باہر کے علاقوں میں بھی حزب اللہ کے دہشت گردانہ ڈھانچے کے حصوں، لانچنگ پوزیشنوں، دہشت گردوں اور ان کے کمانڈ مراکز پر 80 سے زیادہ حملے کیے۔‘‘

بیان کے مطابق، ’’ان حملوں میں حزب اللہ کے ایسے درجنوں دہشت گردوں کو ہلاک کر دیا گیا، جو ان کمانڈ سینٹرز اور لانچنگ پوزیشنوں کے ذریعے اپنی سرگرمیاں جاری رکھے ہوئے تھے۔‘‘

اسرائیل نے اس سے قبل تصدیق کی تھی کہ اس نے جنگ بندی کی تصدیق سے پہلے مشرقی لبنان کی وادی بقاع میں حزب الله کے دو کمانڈ سینٹرز کو نشانہ بنایا۔