اسرائیل کے لبنان پر فضائی حملے، راکٹوں کے جواب میں کارروائی کا اعلان

یروشلم (ڈیلی اردو) اسرائیلی فوج کی طرف سے اتوار سات جون کے روز کہا گیا کہ ہمسایہ ملک لبنان سے اسرائیلی علاقے میں دو نئے پروجیکٹائل لانچ کیے گئے، جنہیں فضا میں ہی تباہ کر دیا گیا۔ اس کے بعد لبنان جنگ میں جاری فائر بندی کے باوجود اسرائیل نے لبنان پر نئے سرے سے فضائی حملے بھی کیے۔

ملکی وزیر اعظم بینجمن نیتن یاہو کے دفتر کی طرف سے کہا گیا کہ ان تازہ کارروائیوں کے دوران اسرائیل نے لبنانی دارالحکومت بیروت کے جنوبی مضافات میں بھی فضائی حملے کیے اور حزب اللہ سے جڑے اہداف کو نشانہ بنایا گیا۔

اسرائیلی فوج کی طرف سے یہ نہیں بتایا گیا کہ لبنان سے فائر کیے گئے دونوں نئے پروجیکٹائل میزائل تھے، راکٹ یا پھر مسلح ڈرونز۔ تاہم یہ تصدیق کر دی گئی کہ ان پروجیکٹائلز کو فضا میں ہی نشانہ بنا کر تباہ کر دیا گیا اور اس کے بعد لبنان میں حزب اللہ کے اہداف پر پھر فضائی حملے کیے گئے۔

ایک فوجی بیان میں کہا گیا، ’’ان دونوں پروجیکٹائلز کو تباہ کر دینے کے بعد لبنان میں جو تازہ فضائی حملے کیے گئے، ان میں ان لانچنگ سائٹس کو تباہ کر دیا گیا، جنہیں استعمال کرتے ہوئے دہشت گرد تنظیم حزب اللہ نے یہ پروجیکٹائلز اسرائیل کی طرف فائر کیے تھے۔‘‘

اتوار ہی کے روز اسرائیلی دفاعی افواج (آئی ڈی ایف) نے جنوبی لبنان کے شہر صور کے زیادہ تر حصوں اور ان کے نواحی علاقوں کے مکینوں کے لیے یہ وارننگ بھی جاری کر دی کہ وہ اپنے گھروں سے رخصت ہو جائیں اور یہ علاقے خالی کر دیں۔

تازہ اسرائیلی فضائی حملوں کے بارے میں ایران نواز لبنانی ملیشیا حزب اللہ کی طرف سے آخری خبریں ملنے تک کچھ نہیں کہا گیا تھا۔ تاہم حزب اللہ نے یہ دعویٰ ضرور کیا کہ اس نے اتوار کے روز اسرائیلی فوجیوں پر حملے کیے۔

لبنان جنگ میں 17 اپریل سے فائر بندی جاری ہے لیکن اسرائیل اور حزب اللہ دونوں ہی کی طرف سے اس سیزفائر کا پوری طرح احترام نہیں کیا جا رہا۔

لبنانی اور اسرائیلی سفارتی نمائندوں نے امریکہ کے دارالحکومت واشنگٹن میں اسی ہفتے اپنی بات چیت کے بعد ایک توسیع شدہ اور مشروط فائر بندی کا اعلان کیا تھا، مگر جنگی فریقین کے ایک دوسرے پر حملے پھر بھی جاری ہیں۔