اسپین پہنچنے کی کوشش میں 2025 کے دوران 3 ہزار سے زائد تارکینِ وطن ہلاک، واکنگ بارڈرز

میڈرڈ (ڈیلی اردو) اسپین میں تارکینِ وطن کے حقوق کے لیے سرگرم ایک بڑی تنظیم کے مطابق سال 2025 کے دوران اسپین پہنچنے اور اسپین کے راستے یورپی یونین میں داخل ہونے کی کوشش میں تین ہزار سے زائد تارکینِ وطن ہلاک ہو گئے۔

ہسپانوی دارالحکومت میڈرڈ سے موصولہ رپورٹوں کے مطابق کامینانڈو فرنٹیراس (واکنگ بارڈرز) نامی تنظیم نے بتایا کہ 2025 کے دوران خطرناک سمندری راستوں کے ذریعے اسپین کی ریاستی حدود میں داخل ہونے کی کوشش کے دوران 3 ہزار سے زائد تارکینِ وطن اپنی جانیں گنوا بیٹھے۔

تنظیم کے مطابق اگرچہ یورپ تک پہنچنے کے سمندری راستے اب بھی انتہائی خطرناک ہیں، تاہم 2025 میں ہلاکتوں کی تعداد 2024 کے مقابلے میں نمایاں طور پر کم رہی۔ اس کی وجہ یہ بتائی گئی ہے کہ رواں سال پناہ کی تلاش میں یورپی یونین اور اسپین کا رخ کرنے والے تارکینِ وطن کی مجموعی تعداد میں کمی واقع ہوئی ہے۔

کامینانڈو فرنٹیراس کے اعداد و شمار کے مطابق یکم جنوری سے 15 دسمبر 2025 تک افریقی ممالک سے سمندر عبور کر کے اسپین پہنچنے کی کوشش کے دوران کم از کم 3,090 تارکینِ وطن ہلاک ہو چکے تھے۔

تنظیم نے خبردار کیا ہے کہ بہتر سرحدی نگرانی کے باوجود غیر محفوظ کشتیوں اور اسمگلروں کے رحم و کرم پر کیے جانے والے یہ سفر اب بھی انسانی جانوں کے لیے شدید خطرہ بنے ہوئے ہیں۔