افغانستان میں کنڑ یونیورسٹی پر حملے کے دعوے، پاکستان نے تردید کر دی

کابل/اسلام آباد (ڈیلی اردو/بی بی سی) افغانستان کے صوبہ کنڑ میں سید جمال الدین افغان یونیورسٹی پر مبینہ حملے کے حوالے سے افغان اور پاکستانی حکام کے متضاد مؤقف سامنے آئے ہیں۔

افغان وزارتِ اعلیٰ تعلیم نے واقعے کی مذمت کرتے ہوئے دعویٰ کیا ہے کہ مبینہ میزائل حملے میں تقریباً 30 طلبہ اور اساتذہ ہلاک یا زخمی ہوئے ہیں، جبکہ یونیورسٹی کی عمارتوں کو بھی شدید نقصان پہنچا ہے۔

اس سے قبل کنڑ کے محکمہ اطلاعات و ثقافت کے سربراہ نے دعویٰ کیا تھا کہ پاکستانی فوج کے مبینہ حملوں میں تین افراد ہلاک اور 45 زخمی ہوئے، جن میں خواتین اور بچے بھی شامل ہیں۔

دوسری جانب پاکستان کی وزارتِ اطلاعات نے ان تمام دعوؤں کو سختی سے مسترد کرتے ہوئے کہا ہے کہ پاکستان نے کنڑ یونیورسٹی یا کسی بھی شہری علاقے کو نشانہ نہیں بنایا۔ وزارت کے مطابق پاکستان صرف درست انٹیلیجنس معلومات کی بنیاد پر کارروائیاں کرتا ہے۔

افغان حکام اور بعض میڈیا رپورٹس میں واقعے سے متعلق مختلف دعوے سامنے آئے ہیں، جبکہ بی بی سی پشتو کو موصول ہونے والی ویڈیوز میں یونیورسٹی اور ہاسٹل کو نقصان کے مناظر دیکھے جا سکتے ہیں، تاہم ان دعوؤں کی آزادانہ تصدیق تاحال نہیں ہو سکی۔