افغانستان کا مچھ واقعے میں ہلاک مزدوروں کی میتیں حوالے کرنے کا مطالبہ

اسلام آباد (ڈیلی اردو) افغانستان نے مچھ واقعہ میں ہلاک ہونے والے 3 مزدوروں کی میتیں حوالے کرنے کا مطالبہ کیا ہے۔

تفصیلات کے مطابق افغان قونصلر جنرل نے سانحہ مچھ میں ہلاک تین افراد کی میتیں افغانستان بھیجنے کی درخواست کی ہے۔

افغان قونصل جنرل نے پاکستانی وزارت خارجہ کو ایک خط میں کہا ہے کہ مچھ میں ہونے والے افسوسناک واقعہ میں ہلاک ہونے والوں میں سات افغانی شہری بھی شامل ہیں۔

د پاکستان په بلوچستان ایالت کې د اوو تنو افغان وګړو د وژنې په تړاو د افغانستان بهرنیو چارو وزارت مطبوعاتي اعلامیه pic.twitter.com/X5LSRwT9yE

— Ministry of Foreign Affairs – Afghanistan ???????? (@mfa_afghanistan) January 4, 2021

وزارت خارجہ کو بھیجے گئے خط میں درخواست کی گئی ہے کہ ہلاک شدگان میں سات افغانیوں میں سے تین کی میتیں واپس افغانستان بھجوانے کا بندوبست کیا جائے جبکہ دیگر چار کے اہل خانہ پاکستان میں ہی ہیں اس لئے ان کی واپسی کا مطالبہ نہیں کیا گیا۔

خط میں کہا گیا ہے کہ حملہ کرنے والے دونوں ملکوں کے دشمن ہیں۔

واضح رہے کہ بلوچستان کے ضلع بولان کی تحصیل مچھ کے علاقے گشتری میں 2 اور 3 جنوری کی درمیانی شب داعش کے دہشت گردوں نے کوئلے کی کان میں کام کرنے والے شیعہ ہزارہ برادری سے تعلق رکھنے والے مزدوروں کو اغوا کر کے پہلے پہاڑوں پر لے گئے اور پھر ان کو ذبح کر دیا گیا تھا، واقعے میں 11 مزدور ہلاک اور 6 زخمی ہوئے تھے۔