اقوام متحدہ میں پاکستانی صحافی کا سوال، جے شنکر نے پاکستان کو ’دہشتگرد ملک‘ قرار دے دیا

واشنگٹن(ڈیلی اردو) نیویارک میں اقوام متحدہ کی جنرل اسمبلی کے 81ویں اجلاس کے موقع پر بھارتی وزیر خارجہ ایس جے شنکر اور ایک پاکستانی صحافی کے درمیان تلخ جملوں کا تبادلہ ہوا، جہاں جے شنکر نے ایک سوال کے جواب میں پاکستان کو ’’دہشتگرد ملک‘‘ قرار دیتے ہوئے سخت ردعمل کا اظہار کیا۔

یہ واقعہ اس وقت پیش آیا جب جے شنکر اور لائبیریا کی وزیر خارجہ سارا بیسولو نیانتی اقوام متحدہ کے ہیڈکوارٹرز میں سمندری راستوں اور بحری جہازوں کی سلامتی سے متعلق ایک نئے گروپ کے حوالے سے صحافیوں سے گفتگو کر رہے تھے۔

پریس بریفنگ کے اختتام پر ایک پاکستانی صحافی نے بھارتی وزیر خارجہ سے سوال کیا کہ بھارت پاکستان میں مبینہ دہشتگردی کی حمایت کب بند کرے گا۔ اس پر جے شنکر نے جواب دیا کہ ’’ایک دہشتگرد ملک مجھ سے یہ سوال کر رہا ہے؟‘‘

بھارتی میڈیا رپورٹس کے مطابق جے شنکر کے جواب کے بعد اقوام متحدہ میں بھارت کے مستقل نمائندے ہریش پروتھنینی نے صحافی سے کہا کہ وہ وزیر خارجہ کا جواب سن چکے ہیں اور جواب واضح ہے۔

دونوں ممالک کے درمیان دہشتگردی اور سرحد پار سکیورٹی سے متعلق الزامات پہلے بھی سفارتی سطح پر اختلاف کا باعث بنتے رہے ہیں، تاہم موجودہ واقعہ اقوام متحدہ کی جنرل اسمبلی کے اجلاس کے موقع پر سامنے آیا ہے۔