امریکا آنے والے 2 ہزار افغان شہری دہشت گرد تنظیموں سے منسلک، تلسی گبارڈ انٹیلیجنس ڈائریکٹر

واشنگٹن (ڈیلی اردو) امریکا میں موجود دو ہزار افغان شہریوں کے دہشت گرد تنظیموں سے روابط کا انکشاف سامنے آیا ہے۔

نیشنل انٹیلی جنس کی ڈائریکٹر تلسی گبارڈ نے امریکی نیوز چینل فوکس نیوز کو دیے گئے ایک انٹرویو میں بائیڈن انتظامیہ کے دور میں امریکا آنے والے افغان شہریوں کی جانچ پڑتال کے سست اور غیر مؤثر عمل پر سخت تنقید کی۔ انہوں نے بتایا کہ آپریشن الائیز ویلکم کے تحت 18 ہزار افغان شہری امریکا میں داخل ہوئے۔

تلسی گبارڈ کا کہنا تھا کہ بائیڈن انتظامیہ کے دوران امریکا آنے والے افغان شہریوں کی مناسب جانچ نہیں کی گئی۔ تاہم انہوں نے واضح کیا کہ آپریشن الائیز ویلکم کے تحت آنے والے ہر افغان شہری کا اب باریک بینی سے جائزہ لیا جا رہا ہے اور اس مقصد کے لیے تمام متعلقہ ادارے متحرک ہیں۔

انہوں نے انکشاف کیا کہ امریکا آنے والے 18 ہزار افغان شہریوں میں سے تقریباً 2 ہزار کے دہشت گرد تنظیموں سے براہِ راست یا ممکنہ روابط پائے گئے ہیں۔

نیشنل انٹیلی جنس کی ڈائریکٹر کے مطابق داعش اور دیگر دہشت گرد تنظیمیں مسلسل امریکی سرزمین پر حملوں کی منصوبہ بندی میں مصروف ہیں اور یہ تنظیمیں امریکا میں ایسے افراد کی تلاش میں رہتی ہیں جو ان منصوبوں کو عملی جامہ پہنا سکیں۔ انہوں نے کہا کہ اسی وجہ سے اس خطرے کو انتہائی سنجیدگی سے لیا جا رہا ہے۔

تلسی گبارڈ نے مزید کہا کہ گزشتہ چند برسوں کے دوران غیر قانونی طور پر امریکا میں داخل ہونے والوں کی تعداد میں بھی نمایاں اضافہ ہوا ہے۔