امریکا ایران کشیدگی میں مذاکرات کی راہ ہموار، ہرمز اور جوہری پروگرام اہم نکات بن گئے

واشنگٹن/تہران(ڈیلی اردو) امریکا اور ایران کے درمیان جاری کشیدگی کے دوران مذاکرات کے امکانات ایک بار پھر زیرِ بحث آگئے ہیں، تاہم ممکنہ معاہدے کی راہ میں ایران کے اندرونی اختلافات اور مختلف معاملات پر دونوں ممالک کے متضاد مؤقف بڑی رکاوٹ بنے ہوئے ہیں۔

امریکی صدر ڈونلڈ ٹرمپ کی جانب سے ایران کے ساتھ بات چیت کے عندیے کے بعد سفارتی حل کی امید پیدا ہوئی ہے، جبکہ ایرانی صدر مسعود پزشکیان بھی بحران ختم کرنے کے لیے مذاکرات کے حق میں دکھائی دیتے ہیں۔ دوسری جانب پاسدارانِ انقلاب آبنائے ہرمز سمیت خطے میں موجود دباؤ کے ذرائع کو برقرار رکھنے کے مؤقف پر قائم ہے۔

تجزیہ کاروں کے مطابق واشنگٹن کی فوری ترجیحات میں آبنائے ہرمز سے بحری آمدورفت کی بحالی اور تجارتی جہازوں کو درپیش خطرات کا خاتمہ شامل ہوسکتا ہے۔ اس کے بدلے میں ایران پر عائد دباؤ یا پابندیوں میں مرحلہ وار نرمی کی گنجائش پیدا ہونے کا امکان ہے۔

ایران کے جوہری پروگرام کا معاملہ بھی کسی ممکنہ معاہدے میں مرکزی حیثیت رکھتا ہے۔ امریکی جانب سے یورینیم افزودگی، جوہری ذخائر، نگرانی اور معائنوں سمیت دیگر معاملات پر قابلِ تصدیق یقین دہانیوں کا مطالبہ کیے جانے کا امکان ظاہر کیا جارہا ہے، جبکہ تہران اپنے جوہری پروگرام سے متعلق اپنے مفادات کا تحفظ چاہتا ہے۔

تجزیہ کاروں کا کہنا ہے کہ مذاکرات کی صورت میں فوری طور پر کسی جامع معاہدے کے بجائے مرحلہ وار سمجھوتے کا امکان زیادہ ہوسکتا ہے۔ پہلے مرحلے میں آبنائے ہرمز اور علاقائی کشیدگی سے متعلق اقدامات، جبکہ بعد میں جوہری پروگرام اور دیگر اختلافی امور پر بات چیت ہوسکتی ہے۔

دوسری جانب تہران کے اندر یہ سوال بھی اہم ہے کہ جنگ بندی یا مذاکرات سے متعلق حتمی فیصلہ کس سطح پر ہوگا۔ ایرانی حکومت اور پاسدارانِ انقلاب کے مؤقف میں پائے جانے والے فرق کے باعث کسی بھی ممکنہ سفارتی پیش رفت کا راستہ پیچیدہ دکھائی دیتا ہے۔