امریکا کا 5 ایرانی آئل ٹینکرز تباہ کرنے کا دعویٰ، حملوں کی ویڈیوز بھی جاری

تہران / واشنگٹن(ڈیلی اردو) امریکی سینٹرل کمانڈ نے دعویٰ کیا ہے کہ امریکی فورسز نے ایران کا خام تیل لے جانے والے 5 آئل ٹینکرز کو کارروائی کرکے تباہ کر دیا ہے۔

سینٹکام کے مطابق یہ کارروائی ایرانی پاسداران انقلاب کی جانب سے دو روز کے دوران امریکی جنگی بحری جہاز کو بیلسٹک میزائلوں سے نشانہ بنانے کی دو کوششوں کے بعد کی گئی۔

امریکی حکام کا کہنا ہے کہ امریکی جنگی جہاز نے ایرانی میزائل حملوں کی کوششوں کو ناکام بنا دیا اور ان واقعات میں کسی امریکی اہلکار کو نقصان نہیں پہنچا۔

امریکی وزیر خارجہ مارکو روبیو نے ایران کو خبردار کیا ہے کہ اگر تہران نے امریکی جنگی بحری جہازوں کو نشانہ بنانے کی کوششیں جاری رکھیں تو اسے اپنے آئل ٹینکرز سے محروم ہونا پڑے گا۔

امریکی فوج کے مطابق ایرانی آئل ٹینکرز کے خلاف کارروائی امریکی بحری جہازوں پر ہونے والے مبینہ حملوں کے جواب میں کی گئی، جبکہ سینٹکام نے کارروائی کی ویڈیوز بھی جاری کی ہیں۔

دوسری جانب ایرانی سرکاری میڈیا نے دعویٰ کیا ہے کہ ایران نے اردن میں امریکی اہداف کو میزائل حملوں کا نشانہ بنایا۔ تاہم امریکی سینٹرل کمانڈ کی جانب سے اردن میں موجود امریکی ایئربیس پر مبینہ میزائل حملے کے بارے میں فوری طور پر مزید تفصیلات جاری نہیں کی گئیں۔