امریکہ نے حملہ کیا تو نتائج کی ذمہ داری واشنگٹن پر ہوگی، ایران

تہران (ڈیلی اردو) ایران کی جوائنٹ ملٹری کمانڈ نے خبردار کیا ہے کہ اگر امریکہ نے ایران کے خلاف مزید حملے کیے تو اسے پہلے سے کہیں زیادہ سخت جواب دیا جائے گا۔

ایرانی فوجی قیادت نے اپنے بیان میں کہا کہ امریکہ ایک جانب معاہدے اور سفارت کاری کی بات کرتا ہے جبکہ دوسری جانب جارحانہ اقدامات کر رہا ہے، جو ایک کھلا تضاد ہے۔

یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے کہا تھا کہ امریکہ ایران پر ’’بہت سخت‘‘ حملہ کرے گا۔ ٹرمپ نے یہ بھی کہا تھا کہ امریکہ مستقبل قریب میں ایران کی تیل اور گیس کی منڈیوں پر ’’مکمل کنٹرول‘‘ حاصل کرنے کا ارادہ رکھتا ہے۔

ٹرمپ کے بیان پر ردعمل دیتے ہوئے ایران کی جوائنٹ ملٹری کمانڈ نے خبردار کیا کہ ’’یا تو تیل اور گیس کی برآمدات سب کے لیے ہوں گی یا پھر کسی کے لیے نہیں ہوں گی۔‘‘

ایرانی حکام کا کہنا ہے کہ ملکی خودمختاری اور اقتصادی مفادات کے خلاف کسی بھی اقدام کا بھرپور جواب دیا جائے گا، جبکہ خطے میں بڑھتی ہوئی کشیدگی کے باعث صورتحال بدستور غیر یقینی ہے۔