اپر اورکزئی : نامعلوم افراد کی فائرنگ جے یو آئی رہنما ہلاک

اپر اورکزئی(ڈیلی اردو) خیبرپختونخوا کے شورش زدہ ضلع اورکزئی کی اپر تحصیل ڈبوری میں نامعلوم دہشتگردوں نے فائرنگ کرکے جمعیت علمائے اسلام سے وابستہ رہنما حاجی رحمان کو ہلاک کردیا۔

ذرائع کے مطابق فائرنگ کا واقعہ تھانہ ڈبوری کی حدود میں گاؤں گانڈی تال کے مقام پر پیش آیا، جہاں مسلح افراد نے حاجی رحمان کو نشانہ بنایا اور کارروائی کے بعد فرار ہوگئے۔

واقعے کی اطلاع ملتے ہی سیکیورٹی اداروں اور متعلقہ پولیس نے علاقے کو گھیرے میں لے لیا اور حملہ آوروں کی تلاش کے لیے کارروائی شروع کردی۔ جائے وقوعہ سے شواہد اکٹھے کرکے واقعے کی مختلف پہلوؤں سے تحقیقات بھی کی جا رہی ہیں۔

حاجی رحمان کا تعلق جمعیت علمائے اسلام سے بتایا جاتا ہے۔ واقعے کے محرکات اور حملے میں ملوث دہشتگردوں سے متعلق مزید معلومات تاحال سامنے نہیں آسکیں، جبکہ سیکیورٹی اداروں کی جانب سے تحقیقات جاری ہیں۔