ایران : سیستان و بلوچستان میں سیکیورٹی آپریشن، 3 مبینہ دہشتگرد ہلاک، 9 گرفتار

تہران(ڈیلی اردو) ایران کی وزارتِ اطلاعات نے پاکستانی سرحد سے متصل صوبے سیستان و بلوچستان میں سیکیورٹی کارروائی کے دوران 3 مبینہ دہشتگرد نیٹ ورکس کو توڑنے کا دعویٰ کیا ہے۔ ایرانی حکام کے مطابق کارروائی میں 3 مبینہ دہشتگرد ہلاک جبکہ 9 افراد کو گرفتار کیا گیا۔

ایرانی وزارتِ اطلاعات کے مطابق سیکیورٹی فورسز نے خفیہ معلومات کی بنیاد پر کارروائی کرتے ہوئے ایسے افراد کو نشانہ بنایا جو حکام کے بقول تخریبی یا دہشتگرد کارروائیوں کی منصوبہ بندی کر رہے تھے۔

صوبائی انٹیلی جنس حکام کا کہنا ہے کہ سرحد پار سے ایران میں داخل ہونے والے مشتبہ افراد اور سیکیورٹی فورسز کے درمیان جھڑپ ہوئی، جس کے دوران 3 مبینہ دہشتگرد ہلاک ہوئے جبکہ 9 دیگر افراد کو حراست میں لے لیا گیا۔

ایرانی حکام کے مطابق گرفتار افراد نے بیرون ملک فوجی اور بم بنانے کی تربیت حاصل کر رکھی تھی اور وہ غیر روایتی راستوں کے ذریعے ایران میں داخل ہوئے تھے۔ حکام نے دعویٰ کیا کہ ان کا مقصد صوبے کے جنوبی اضلاع میں بدامنی پیدا کرنا اور شہریوں میں خوف و ہراس پھیلانا تھا۔

وزارتِ اطلاعات نے مزید دعویٰ کیا کہ کارروائی میں نشانہ بنائے گئے تینوں نیٹ ورکس کو امریکی اور اسرائیلی خفیہ اداروں کی حمایت حاصل تھی اور انہیں ایک منظم منصوبے کے تحت ایران بھیجا گیا تھا۔

ایرانی سیکیورٹی حکام کے مطابق کارروائی کے دوران گرفتار افراد کے قبضے سے مختلف اقسام کا جدید اسلحہ اور گولہ بارود برآمد کیا گیا، جبکہ ایک خفیہ مقام سے ہلکے اور نیم بھاری ہتھیاروں کا ذخیرہ بھی برآمد کرنے کا دعویٰ کیا گیا ہے۔

ایرانی حکام کے ان دعوؤں کی آزاد ذرائع سے تصدیق سامنے نہیں آئی۔