ایران جنگ: پاکستان اور لبنان کی فوجی سربراہان میں اہم ملاقات

راولہنڈی (ڈیلی اردو) مشرق وسطیٰ کے بحران کے خاتمے کے لیے کئی ہفتوں سے معاہدہ طے کرانے کی کوششیں جاری ہیں، لیکن ایران اور امریکہ دونوں نے سخت مؤقف اختیار کر رکھا ہے۔ علاوہ ازیں اسرائیل اور حزب اللہ کے درمیان جاری کشیدگی بھی ایک اہم مسئلہ بنی ہوئی ہے۔

اسی تناظر میں  لبنان کے آرمی چیف جنرل روڈولف ہائیکل منگل کے روز پاکستان پہنچے ، جہاں انہوں نے پاکستان کے آرمی چیف فیلڈ مارشل عاصم منیر سے ملاقات کی، جو ایران-امریکہ مذاکرات میں ایک اہم کردار ادا کر رہے ہیں۔

یہ ملاقات ایران-امریکہ تنازع کے تناظر میں اہم سمجھی جا رہی ہے،  کیونکہ پاکستان اس معاملے میں کلیدی ثالثی کردار ادا کر رہا ہے۔

خبر رساں ادارے اے ایف پی کے مطابق دونوں فوجی سربراہوں نے خطے میں بدلتی ہوئی سکیورٹی صورتحال، دفاعی تعاون اور دوطرفہ عسکری تعلقات کو مزید فروغ دینے کے امکانات پر تبادلہ خیال کیا نیز دونوں کے مابین باہمی دلچسپی کے امور پر بھی بات چیت ہوئی۔

راولپنڈی میں ملاقات سے قبل لبنانی  مسلح افواج کے سربراہ جنرل روڈولف ہائیکل کو گارڈ آف آنر پیش کیا گیا، جبکہ فیلڈ مارشل عاصم منیر نے لبنانی مسلح افواج کے ساتھ دفاعی تعاون کو وسعت دینے کے لیے پاکستان فوج کے عزم کا اعادہ کیا۔

ادھر لبنان میں جاری حملے گزشتہ کئی ہفتوں سے جنگ کو باضابطہ طور پر ختم کرنے کی جاری کوششوں کا ایک اہم نکتہ بن چکا ہے۔

جنرل ہائیکل کے دورے کے دوران بھی لڑائی میں مزید شدت دیکھنے میں آئی، اگرچہ ایران اور اسرائیل دونوں نے پیر کے  روز اشارہ دیا تھا کہ انہوں نے جھڑپیں روک دی ہیں۔

امریکی صدر  ڈونلڈ ٹرمپ ، جو امن مذاکرات کی سست رفتار پیش رفت پر مایوسی کا اظہار کر چکے ہیں، نے منگل کو کہا کہ معاہدے تک پہنچنے کے لیے مذاکرات ’’آخری مراحل‘‘ میں داخل ہو چکے ہیں۔