ایران میں غیر قانونی داخلے پر بارڈر گارڈز کی فائرنگ سے 10 افغان شہری ہلاک

کابل (ڈیلی اردو) افغان حکام نے دعویٰ کیا ہے کہ ایران میں داخل ہونے کی کوشش کرنے والے کم از کم 10 افغان شہری ایرانی بارڈر گارڈز کی فائرنگ سے ہلاک ہوگئے۔

غیر ملکی میڈیا کے مطابق، افغانستان کے مغربی صوبے فراہ کی سکیورٹی کمان کے ترجمان محمد نسیم بدری نے سرکاری ریڈیو کو بتایا کہ یہ افراد روزگار کی تلاش میں ایران گئے تھے اور پیر کی رات شیخ ابو نصر فراحی بارڈر پوائنٹ کے ذریعے ایران کی حدود میں داخل ہو رہے تھے، جہاں فائرنگ کرکے انہیں ہلاک کر دیا گیا۔

ترجمان کے مطابق تمام ہلاک شدگان صوبہ فراہ کے رہائشی تھے اور غیر قانونی طور پر سرحد پار کر رہے تھے۔ اسی گروہ میں شامل دو افغان شہری تاحال لاپتا ہیں جبکہ واقعے کی تحقیقات جاری ہیں۔ ایران کی جانب سے اس واقعے پر اب تک کوئی ردعمل سامنے نہیں آیا۔

واقعہ ایسے وقت پیش آیا ہے جب ایران اور افغانستان کی سرحد پر کشیدگی میں اضافہ ہو رہا ہے۔ گزشتہ ایک سال کے دوران ایران سیکڑوں افغان مہاجرین کو زبردستی واپس بھیج چکا ہے۔