ایران میں فوجی قیادت میں بڑی تبدیلیاں، 6 نئے کمانڈرز مقرر

تہران (ڈیلی اردو) ایران کے سپریم لیڈر مجتبیٰ خامنہ ای نے مسلح افواج کے اہم عہدوں پر نئی تقرریوں کی منظوری دے دی ہے، جس کے تحت جنرل اسٹاف، پاسداران انقلاب اور بسیج فورس کی اعلیٰ قیادت میں تبدیلیاں کی گئی ہیں۔

ایرانی سپریم لیڈر کے سوشل میڈیا اکاؤنٹس پر جاری بیان کے مطابق مجموعی طور پر 6 نئے فوجی کمانڈرز کا تقرر کیا گیا ہے۔ ان میں مسلح افواج کے چیف آف اسٹاف اور پاسداران انقلاب کے کمانڈر ان چیف کی تعیناتی بھی شامل ہے۔

میجر جنرل پائلٹ علی عبداللہی کو مسلح افواج کا نیا چیف آف اسٹاف مقرر کیا گیا ہے۔ وہ اس سے قبل خاتم الانبیا سینٹرل ہیڈکوارٹرز کے کمانڈر کی ذمہ داریاں انجام دے رہے تھے، جو ایرانی مسلح افواج کی مختلف شاخوں کے درمیان آپریشنل رابطے اور کوآرڈی نیشن کا اہم مرکز ہے۔

دوسری جانب بریگیڈیئر جنرل احمد واحدی کو ترقی دے کر میجر جنرل بنایا گیا اور انہیں پاسداران انقلاب کا نیا کمانڈر ان چیف مقرر کیا گیا ہے، جبکہ مصطفیٰ ایزدی کو ان کا نائب مقرر کیا گیا ہے۔

ریئر ایڈمرل علی عظمایی کو پاسداران انقلاب کی بحریہ کی کمان سونپی گئی ہے، جبکہ حسین طائب کو بسیج فورس کا سربراہ مقرر کیا گیا ہے۔ کیومرث حیدری کو مسلح افواج کے نئے چیف آف اسٹاف علی عبداللہی کا نائب مقرر کیا گیا ہے۔

ایران میں فوجی قیادت کی یہ تبدیلیاں ایسے وقت میں سامنے آئی ہیں جب حالیہ ایران، امریکا اور اسرائیل جنگ کے بعد تہران کو متعدد سیکیورٹی چیلنجز کا سامنا ہے اور جنگ کے دوران کئی اعلیٰ فوجی کمانڈروں کی ہلاکت کے بعد عسکری قیادت میں بڑے پیمانے پر تبدیلیاں کی جا رہی ہیں۔