ایران نے اہم دفاعی تنصیبات اور صلاحیتیں زیرِ زمین منتقل کردیں: وزارتِ دفاع

تہران(ڈیلی اردو) ایران کی وزارتِ دفاع نے دعویٰ کیا ہے کہ ملک نے اپنی بعض اہم دفاعی تنصیبات اور عسکری صلاحیتوں کو زیرِ زمین منتقل کردیا ہے تاکہ دفاعی نظام اور ہتھیاروں کی تیاری سے متعلق معلومات دشمن کی دسترس سے محفوظ رکھی جاسکیں۔

ایرانی وزارتِ دفاع کے ترجمان رضا طلائی نیک کے مطابق زیرِ زمین منتقل کی جانے والی تنصیبات کا مقصد ایران کی دفاعی صلاحیتوں اور اسلحہ سازی کے نظام کو مکمل طور پر ظاہر ہونے سے روکنا ہے۔ ان کا کہنا تھا کہ دفاعی شعبے میں داخلی صلاحیتوں کو مزید مضبوط بنانا بھی ایران کی ترجیحات میں شامل ہے۔

ایرانی نیم سرکاری خبر رساں ادارے کے مطابق رضا طلائی نیک نے ایران کے خلاف ہونے والی جنگ کا حوالہ دیتے ہوئے کہا کہ امریکہ اپنے بیان کردہ تزویراتی مقاصد حاصل نہیں کرسکا، جن میں خطے میں ایران کی پوزیشن کو کمزور کرنا بھی شامل تھا۔ ان کے بقول ایران نے بھی مخالف فریق کو نقصان پہنچایا اور اس پر دباؤ برقرار رکھا۔

ترجمان نے کہا کہ ایران دفاعی صلاحیتوں میں اضافے کے ساتھ ساتھ ملک کے اندر موجود صنعتی اور تکنیکی استعداد کو مستحکم کرنے پر بھی توجہ دے رہا ہے۔ تاہم زیرِ زمین منتقل کی گئی تنصیبات کی تعداد، مقامات اور نوعیت کے بارے میں انہوں نے مزید تفصیلات فراہم نہیں کیں۔