ایران نے سنگین غلطی کی، بھرپور جواب دیں گے، اسرائیلی فوج

تل ابیب (ڈیلی اردو) اسرائیلی فوج نے ایران کی جانب سے حالیہ حملوں کے بعد سخت ردعمل دیتے ہوئے کہا ہے کہ ایران نے اسرائیل پر حملہ کر کے ’’سنگین غلطی‘‘ کی ہے، جبکہ اسرائیلی فوجی قیادت نے واضح کیا ہے کہ مستقبل کی کارروائیوں کے لیے منصوبہ بندی جاری ہے۔

اسرائیلی فوج کے ترجمان بریگیڈیئر جنرل ایفی ڈفرین نے پریس کانفرنس کرتے ہوئے کہا کہ ایرانی ’’دہشت گرد حکومت‘‘ نے ایک سنگین غلطی کی ہے اور اسرائیل اس کا جواب دینے کے لیے تیار ہے۔

اسرائیلی فوج کے ترجمان کے مطابق فوجی چیف آف اسٹاف صورتحال کا مسلسل جائزہ لے رہے ہیں جبکہ مختلف اہداف کے خلاف کارروائیوں کی منظوری بھی دی جا چکی ہے۔

انہوں نے میڈیا سے گفتگو میں کہا کہ اسرائیلی فوج لبنان بھر میں اپنی کارروائیاں جاری رکھے گی اور سکیورٹی صورتحال کے مطابق مزید اقدامات بھی کیے جائیں گے۔

بعد ازاں اسرائیلی آرمی چیف نے بھی ایران کے حملوں پر ردعمل دیتے ہوئے کہا کہ فوج مکمل تیاری کی حالت میں ہے اور حکم ملتے ہی دشمن کے خلاف بھرپور کارروائی کی جائے گی۔

یہ ردعمل ایسے وقت میں سامنے آیا ہے جب ایران نے اسرائیل پر بیلسٹک میزائل حملے کیے، جنہیں تہران نے جنوبی بیروت کے مضافاتی علاقوں پر اسرائیلی حملوں کا جواب قرار دیا۔

یاد رہے کہ جنوبی بیروت پر اسرائیلی حملوں کے بعد ایرانی پارلیمنٹ کی قومی سلامتی کمیٹی کے ترجمان نے خبردار کیا تھا کہ ایران اس کارروائی پر خاموش نہیں رہے گا اور اس کا جواب دیا جائے گا۔