ایران نے مذاکرات کے لیے شرائط امریکہ تک پہنچا دیں، ٹرمپ کے جواب کا انتظار ہے: محسن رضائی

تہران (ڈیلی اردو) ایران کی سپریم نیشنل سکیورٹی کونسل کے سیکریٹری محسن رضائی نے کہا ہے کہ تہران نے قطر اور پاکستان کے ذریعے امریکہ تک مذاکرات سے متعلق اپنی شرائط پہنچا دی ہیں اور اب واشنگٹن کے جواب کا انتظار کیا جا رہا ہے۔

محسن رضائی کے مطابق ایران کی بنیادی شرائط میں تمام محاذوں پر جنگ کا خاتمہ، ایرانی منجمد اثاثوں کی بحالی اور بحری ناکہ بندی ختم کرنا شامل ہے۔ انہوں نے کہا کہ ان معاملات پر قطر اور پاکستان کے ساتھ مشاورت بھی جاری ہے۔

ایرانی عہدیدار نے خبردار کیا کہ ایران پر کسی حملے کی صورت میں ایرانی افواج خطے میں موجود امریکی اڈوں اور امریکی مفادات کو مزید شدت کے ساتھ نشانہ بنا سکتی ہیں۔

جوہری پروگرام کے حوالے سے رضائی نے کہا کہ ایران نے فی الحال جوہری عدم پھیلاؤ کے معاہدے سے نکلنے کا فیصلہ نہیں کیا، تاہم آئندہ کا لائحہ عمل امریکہ کے طرزِ عمل سے جڑا ہوگا۔

انہوں نے مزید کہا کہ ایران اب بھی جوہری ہتھیاروں کے خلاف سابق ایرانی رہنما کے فتوے پر قائم ہے اور اس حوالے سے ملک کی پالیسی میں کوئی تبدیلی نہیں آئی، تاہم مستقبل کے بارے میں حتمی پیش گوئی ممکن نہیں۔

محسن رضائی نے سعودی عرب اور یمن کے درمیان جنگ کے خاتمے کی حمایت کرتے ہوئے کہا کہ ان کے مطابق حوثی باغی بھی سعودی عرب کے ساتھ کسی معاہدے کے خواہاں ہیں۔