ایران کا امریکی اہداف پر جوابی حملہ

تہران (ڈیلی اردو) ایران اور امریکہ کے درمیان خلیج میں کشیدگی ایک بار پھر شدت اختیار کر گئی ہے، جہاں دونوں ممالک نے ایک دوسرے پر حملوں اور معاہدوں کی خلاف ورزی کے الزامات عائد کیے ہیں۔

ایران نے خطے میں امریکی افواج سے منسلک اہداف کو نشانہ بنانے کا اعلان کرتے ہوئے کہا ہے کہ یہ کارروائی امریکہ کی جانب سے ایرانی ساحلی علاقوں پر کیے گئے فضائی حملوں کے جواب میں کی گئی ہے۔

ایرانی وزارتِ خارجہ کے مطابق امریکہ نے ایران کے جنوبی ساحلی علاقے میں فضائی کارروائیاں کرتے ہوئے جنگ بندی اور بین الاقوامی قوانین کی خلاف ورزی کی ہے۔ ایران نے کہا کہ ان حملوں نے اقوام متحدہ کے چارٹر اور دونوں ممالک کے درمیان طے پانے والے مفاہمتی معاہدے کو نقصان پہنچایا ہے۔

ایران نے نشانہ بنائے گئے اہداف کی نوعیت یا مقام کی تفصیل فراہم نہیں کی، تاہم کہا ہے کہ کارروائی امریکی جارحیت کے جواب میں کی گئی۔

دوسری جانب امریکہ نے اعلان کیا تھا کہ اس کی افواج نے ایران کے میزائل اور ڈرون ذخیرہ کرنے کے مراکز اور ساحلی ریڈار تنصیبات کو نشانہ بنایا ہے۔ امریکی حکام کے مطابق یہ کارروائی ایران کی جانب سے آبنائے ہرمز میں ایک تجارتی بحری جہاز پر حملے کے بعد کی گئی۔

امریکی فوج کا کہنا ہے کہ ان کارروائیوں کا مقصد خطے میں بحری تجارتی راستوں کو محفوظ بنانا اور ایران کے ’’خطرناک طرز عمل‘‘ کا جواب دینا ہے۔

ایران اور امریکہ کے درمیان جاری اس کشیدگی کے باعث خلیج کے علاقے میں نازک جنگ بندی کے ٹوٹنے کا خدشہ مزید بڑھ گیا ہے۔