ایران کو حساس ٹیکنالوجی فروخت کرنے پر ایرانی نژاد امریکی گرفتار

واشنگٹن (ش ح ط) ‏امریکا میں ایرانی نژاد امریکی شہری جمشید قومی کو گرفتار کر لیا گیا، امریکی حکام کے مطابق جمشید قومی ایران کو ایسی کمپیوٹر ٹیکنالوجی فروخت کر رہے تھے جو ایرانی فوجی اور جوہری پروگرام میں استعمال ہو رہی تھی۔

امریکی حکام کے مطابق جمشید قومی کیلیفورنیا کے علاقے اورنج کاؤنٹی میں 3 کروڑ 50 لاکھ ڈالر مالیت کی ایک پرتعیش رہائش گاہ میں رہائش پذیر تھے، جبکہ ان کی گرفتاری کے ساتھ ہی اس جائیداد کو ضبط کرنے کا عمل بھی شروع کر دیا گیا ہے۔

حکام کا کہنا ہے کہ ملزم پر ایران پر عائد امریکی پابندیوں کی خلاف ورزی، ایرانی حکومت اور کمپنیوں کو ٹیکنالوجی فراہم کرنے اور غیر قانونی سرگرمیوں سے مالی فائدہ حاصل کرنے کے الزامات عائد کیے گئے ہیں۔

امریکی حکام کے مطابق تحقیقات میں کہا گیا ہے کہ فراہم کی جانے والی بعض ٹیکنالوجیز ایران کے فوجی اور جوہری پروگرام سے منسلک تھیں۔