ایران کے خلاف فوجی دباؤ اور پابندیاں مسئلے کا حل نہیں،عراقچی

تہران (ڈیلی اردو) ایران کے وزیر خارجہ عباس عراقچی نے کہا ہے کہ امریکہ اور ایران کے درمیان جاری کشیدگی کا پائیدار حل فوجی کارروائی یا مزید اقتصادی پابندیوں کے ذریعے ممکن نہیں، بلکہ تنازع کے خاتمے کے لیے سفارتی مذاکرات ہی واحد مؤثر راستہ ہیں۔

تہران میں مختلف ممالک کے سفیروں اور ناظم الامور سے ملاقات کے دوران عباس عراقچی نے امریکی پالیسی پر تنقید کرتے ہوئے کہا کہ واشنگٹن ماضی میں جنگ اور سفارت کاری، دونوں طریقوں کو آزما چکا ہے، تاہم ان سے مسئلہ حل نہیں ہوسکا۔

ایرانی وزیر خارجہ کے مطابق مزید پابندیاں عائد کرکے یا دباؤ بڑھا کر کسی نئے نتیجے تک پہنچنے کی کوشش بھی کامیاب نہیں ہوگی۔ ان کا کہنا تھا کہ تنازع کا حل فریقین کے درمیان برابری، انصاف اور باوقار سفارتی رابطے کے ذریعے تلاش کیا جانا چاہیے۔

عباس عراقچی نے کہا کہ مذاکرات کے ذریعے ایک منصفانہ اور قابل قبول سمجھوتا ہی جنگ کے خاتمے اور ایران کے خلاف جاری فوجی کارروائیوں کے خاتمے کی بنیاد بن سکتا ہے۔

امریکہ کی جانب سے دوبارہ فوجی کارروائی کے امکان پر بات کرتے ہوئے ایرانی وزیر خارجہ نے کہا کہ ایران کسی نئی فوجی پیش قدمی کا خواہاں نہیں، تاہم اگر امریکہ نے دوبارہ طاقت کے استعمال کا راستہ اختیار کیا تو ایران پہلے سے زیادہ تیاری کے ساتھ اپنے دفاع کے لیے ضروری اقدامات کرے گا۔

عراقچی نے امید ظاہر کی کہ امریکی قیادت کشیدگی بڑھانے کے بجائے سمجھ داری کا مظاہرہ کرتے ہوئے سفارتی راستہ اختیار کرے گی۔