ایرانی جنگ بندی تجویز: جوہری پروگرام پر بحث کے بغیر معاہدہ، امریکی رضامندی مشکل

واشنگٹن (ڈیلی اردو) ایران جنگ کے خاتمے کے لیے تہران نے امریکہ کو جو نئی تجویز پیش کی ہے، واشنگٹن کے لیے اسے قبول کرنا بظاہر مشکل نظر آتا ہے۔ اس تجویز میں ایرانی جوہری پروگرام پر بات کیے بغیر آبنائے ہرمز کو دوبارہ کھولنے کی بات کی گئی ہے۔

امریکی دارالحکومت واشنگٹن سے منگل 28 اپریل کو موصولہ رپورٹوں کے مطابق ایران جنگ کے خاتمے کے لیے تہران کی نئی امن پیشکش میں کہا گیا ہے کہ اگر امریکی بحریہ ایران کی بحری ناکہ بندی ختم کر دے، تو تہران آبنائے ہرمز کو معمول کی تجارتی جہاز رانی کے لیے دوبارہ کھولنے پر تیار ہے، تاہم اس عمل کے دوران متنازعہ ایرانی جوہری پروگرام پر کوئی بات نہیں کی جانا چاہیے۔

اس تجویز پر امریکہ کی اب تک کی سوچ اس لیے قدرے سرد مہری سے عبارت ہے کہ واشنگٹن کا تاحال دوہرا مطالبہ یہ رہا ہے کہ ایرانی بندرگاہوں کی ناکہ بندی تب ختم کی جائے گی، جب ایران اپنے جوہری پروگرام سے مکمل دستبرداری کی یقین دہانی کرائے اور ساتھ ہی آبنائے ہرمز کو بھی غیر مشروط طور پر دوبارہ کھول دے۔

امریکہ تک یہ ایرانی تجویز پاکستان نے پہنچائی

امریکہ تک یہ ایرانی تجویز دونوں ممالک کے مابین ثالثی کرنے والے ملک پاکستان کے ذریعے پہنچائی گئی ہے۔ آیا امریکہ جنگ بندی کی نئی ایرانی پیشکش قبول کر سکتا ہے، اس بارے میں امریکی وزیر خارجہ مارکو روبیو کا کل پیر کی رات دیا جانے والا بیان بہت واضح تھا۔ 

روبیو نے فوکس نیوز کے ساتھ ایک انٹرویو میں اس بات کو خارج از امکان قرار دیا کہ امریکہ ایران کے ساتھ اس کے جوہری پروگرام سے متعلق مذاکرات کو مؤخر کرنے پر تیار ہو گا۔

مارکو روبیو نے کہا، ’’ہمیں ایران کے ساتھ کسی بھی جنگ بندی ڈیل میں اس بات کو لازماﹰ یقینی بنانا ہے کہ ایران کو کسی بھی وقت اور کسی بھی طرح کوئی جوہری ہتھیار بنانے سے روکا جائے۔‘‘

سفارتی سطح پر امریکہ کا نئی ایرانی امن تجویز پر ردعمل یہ ہے کہ وائٹ ہاؤس کے مطابق صدر ڈونلڈ ٹرمپ نے اس حوالے سے اپنی قومی سلامتی کی ٹیم کے ساتھ مشاورت کی ہے اور صدر ٹرمپ اس تجویز پر اپنا جواب عنقریب دے دیں گے۔