باجوڑ : سلارزئی کے مقام پر فورسز کی کارروائی، داعش سے وابستہ اہم دہشتگرد ہلاک

باجوڑ(ڈیلی اردو) خیبرپختونخواہ کے شورش زدہ قبائلی ضلع باجوڑ کی تحصیل سلارزئی کے علاقے کوہی ڈھیری میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے داعش سے وابستہ ایک انتہائی مطلوب دہشتگرد کو ہلاک کرنے کا دعویٰ کیا ہے۔

سیکیورٹی ذرائع کے مطابق کارروائی علاقے میں ایک مطلوب دہشتگرد کی موجودگی کی اطلاع ملنے کے بعد کی گئی۔ آپریشن کے دوران فورسز نے نشانہ بنا کر کارروائی کی، جس کے نتیجے میں قادر کا بیٹا عبداللہ ہلاک ہوگیا۔

ذرائع کا کہنا ہے کہ عبداللہ سیکیورٹی اداروں کو دہشتگرد سرگرمیوں اور ٹارگٹ کلنگ میں مبینہ طور پر مطلوب تھا اور اسے داعش سے وابستہ اہم جنگجوؤں میں شمار کیا جاتا تھا۔

سیکیورٹی فورسز کے مطابق کارروائی کا مقصد علاقے میں سرگرم دہشتگرد نیٹ ورک کے خلاف کارروائی کو آگے بڑھانا اور شہریوں کی جان و مال کو لاحق خطرات کا تدارک کرنا ہے۔

حکام کا کہنا ہے کہ دہشتگرد عناصر کے خلاف انٹیلی جنس معلومات کی بنیاد پر کارروائیاں جاری رہیں گی، جبکہ باجوڑ اور ملحقہ علاقوں میں امن و امان برقرار رکھنے کے لیے سیکیورٹی اقدامات مزید مؤثر بنانے پر توجہ دی جا رہی ہے۔

واضح رہے کہ عبداللہ کی ہلاکت اور اس کی داعش سے وابستگی سے متعلق تفصیلات سیکیورٹی ذرائع کے حوالے سے سامنے آئی ہیں، جن کی آزادانہ طور پر مکمل تصدیق تاحال سامنے نہیں آسکی۔