باجوڑ آپریشن: متاثرہ خاندانوں کیلئے امدادی پیکج کا اعلان، متعدد علاقوں کے مکینوں کو نقل مکانی کی ہدایت

پشاور (ڈیل ارود) خیبرپختونخواہ کے ضلع باجوڑ میں جاری آپریشن کے باعث ضلعی و عسکری حکام نے ڈمہ ڈولہ، انعام خورو، چینہ گئی اور چوہترہ کے مکینوں کو ممکنہ سیکیورٹی وجوہات کی بنیاد پر مختصر مدت کے لیے علاقے خالی کرنے کی ہدایت کر دی ہے۔

 ضلعی انتظامیہ کے مطابق یہ اقدام عوام کے تحفظ کو یقینی بنانے کے لیے اٹھایا گیا ہے۔ آپریشن سے متاثرہ 991 خاندانوں میں سے 85 سرکاری و نجی اسکولز اور کالجز میں 6 ہزار 607 افراد پناہ گزین ہیں جبکہ مجموعی متاثرین میں 1 ہزار 497 مرد، 1 ہزار 552 خواتین اور 3 ہزار 558 بچے شامل ہیں۔ سپورٹس اسٹیڈیم کیمپ میں 334 خاندانوں کے 2 ہزار 497 افراد موجود ہیں جبکہ میزبان برادریوں میں تقریباً 20 ہزار خاندانوں کی رجسٹریشن جاری ہے۔ 

خیبر پختونخوا حکومت نے متاثرین کے لیے خصوصی امدادی پیکیج کا اعلان کرتے ہوئے فی خاندان 50 ہزار روپے اور آپریشن مکمل ہونے کے بعد مزید 25 ہزار روپے دینے کی منظوری دی ہے، جس کی تقسیم اے ڈی سی ریلیف کے ذریعے ہوگی۔ 

آئی جی خیبر پختونخوا ذوالفقار حمید کے مطابق باجوڑ آپریشن سے جنوبی اضلاع میں سیکیورٹی صورتحال بہتر ہو گی، ماضی میں پشاور اور کوہاٹ میں دہشت گردی کے بڑے حملے بروقت ناکام بنائے گئے، صوبے میں پہلی بار پولیس نے دہشتگردوں کے ڈرون گرائے اور سیکیورٹی حالات پہلے سے بہتر ہیں۔ 

وزیراعلیٰ خیبر پختونخوا علی امین گنڈاپور نے محکمہ داخلہ کے دورہ کے دوران 210 ملین روپے کی لاگت سے دو ماہ میں قائم ہونے والے پراونشل انٹیلیجنس فیوژن اینڈ تھریٹ اسسمنٹ سنٹر (پفٹیک) کا افتتاح کیا، جو ملک میں اپنی نوعیت کا پہلا صوبائی ادارہ ہے اور وفاقی نیفٹیک سے منسلک ہے۔ وزیراعلیٰ نے کہا کہ دہشتگردی کے خلاف جنگ قومی ایجنڈا ہے اور پفٹیک کی بدولت دہشتگرد سرگرمیوں کی بروقت روک تھام اور مؤثر کارروائیاں ممکن ہوں گی۔