باجوڑ: دہشت گردوں نے گرلز ہائی اسکول کو بارودی مواد سے اڑا دیا

باجوڑ (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع باجوڑ میں دہشت گردوں نے ایک سرکاری گرلز ہائی اسکول کو دھماکہ خیز مواد سے اڑا دیا۔

پولیس کے مطابق واقعہ تھانہ وڑہ ماموند کی حدود میں پیش آیا، جہاں مسلح دہشت گردوں نے سرکاری گرلز ہائی اسکول کی عمارت میں دھماکہ خیز مواد نصب کیا، جس کے پھٹنے سے اسکول کو شدید نقصان پہنچا۔

پولیس کا کہنا ہے کہ واقعے میں کوئی جانی نقصان نہیں ہوا، تاہم اسکول کی عمارت مکمل طور پر تباہ ہو گئی۔

واقعے کے بعد سکیورٹی فورسز اور پولیس نے علاقے کو گھیرے میں لے کر سرچ آپریشن شروع کر دیا ہے، جبکہ حملہ آوروں کی تلاش اور واقعے کی تحقیقات جاری ہیں۔

تاحال کسی گروپ نے اس حملے کی ذمہ داری قبول نہیں کی۔