باجوڑ میں دہشت گردوں نے سرکاری سکول بارودی مواد سے تباہ کردیا

باجوڑ (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع باجوڑ میں نامعلوم دہشت گردوں نے بارودی مواد نصب کرکے ایک سرکاری مڈل سکول کو دھماکے سے تباہ کر دیا۔

پولیس کے مطابق واقعہ تحصیل ماموند کے علاقے لوئی خرکے میں پیش آیا، جہاں گزشتہ رات تقریباً ایک بجے گورنمنٹ مڈل سکول لوئی خرکے کی عمارت کو بارودی مواد سے نشانہ بنایا گیا۔

پولیس کے مطابق دھماکے کے نتیجے میں سکول کے کلاس رومز، باتھ رومز اور مرکزی گیٹ مکمل طور پر تباہ ہو گئے، جبکہ عمارت کو شدید نقصان پہنچا۔ واقعے کے وقت سکول بند ہونے کے باعث کوئی جانی نقصان نہیں ہوا۔

اطلاع ملنے پر پولیس اور دیگر قانون نافذ کرنے والے اداروں کے اہلکار موقع پر پہنچ گئے اور علاقے کو گھیرے میں لے کر شواہد اکٹھے کیے۔ حکام نے واقعے کی تحقیقات شروع کر دی ہیں اور حملہ آوروں کی تلاش جاری ہے۔

تاحال کسی گروپ نے حملے کی ذمہ داری قبول نہیں کی ہے۔