بحرین میں پاسدارانِ انقلاب سے تعاون کے الزام میں 11 افراد کو قید کی سزا

منامہ (ڈیلی اردو) خلیجی عرب ریاست بحرین کی ایک عدالت نے  پاسدارانِ انقلاب سے تعاون کے الزام میں 11افراد کو قید کی سزائیں سنائی ہیں۔

بحرین کے دارالحکومت منامہ سے اتوار 24 مئی کے ملنے والی رپورٹوں کے مطابق ان 11 ملزمان پر الزام تھا کہ انہوں نے ریاست بحرین کے خلاف ایران کی پاسداران انقلاب اسلامی کور (IRGC) کے ساتھ ملی بھگت سے ’’جارحانہ اور دہشت گردانہ کارروائیاں‘‘ کی تھیں، اور عدالت کے مطابق ان پر لگائے گئے الزامات ثابت ہو گئے تھے۔

اس خلیجی ریاست کے سرکاری خبر رساں ادارے نے حکومت کی طرف سے جاری کردہ ایک بیان کا حوالہ دیتے ہوئے بتایا کہ سزائیں پانے والے تمام ملزمان ایران کے پاسداران انقلاب کے لیے حساس ملکی مقامات سے متعلق معلومات جمع کرنے میں ملوث رہے تھے اور انہوں نے ایران کی آئی آر جی سی نامی کور کے لیے مالی وسائل کی منتقلی میں سہولت کاری بھی کی تھی۔

بحرین کی وزارت داخلہ نے نو مئی کے روز کہا تھا کہ ایسے 41 ملزمان گرفتار کر لیے گئے تھے، جن کے ایران کے پاسداران انقلاب کے ساتھ رابطے تھے۔

وزارت داخلہ کے ایک بیان میں تب یہ بھی کہا گیا تھا کہ ان افراد کی ’بحرین دشمن‘ سرگرمیوں کا پتا اس وقت چلا تھا جب ملک کے پبلک پراسیکیوٹر کے دفتر کی طرف سے کی جانے والی تفتیش کے دوران یہ بات سامنے آئی تھی کہ ایک مقامی گروپایران جنگ میں تہران کی طرف سے خلیجی ریاستوں پر کیے جانے والے راکٹ اور ڈرون حملوں کے لیے ہمدردی کا اظہار کر رہا تھا۔

ایران جنگ شروع ہونے کے بعد تہران کی فورسز نے جن خلیجی ریاستوں میں امریکی اور مقامی عسکری اور اسٹریٹیجک نوعیت کے اقتصادی اہداف کو بار بار نشانہ بنایا تھا، ان میں بحرین بھی شامل تھا۔