بحیرہ روم میں جرمن بحری تعیناتی کی تیاری، آبنائے ہرمز مشن کا امکان

برلن (ڈیلی اردو/ڈی پی اے) جرمن وزیر دفاع بورس پسٹوریئس نے کہا ہے کہ جرمنی ممکنہ طور پر آبنائے ہرمز میں فوجی تعیناتی کی تیاری کے تحت بحیرہ روم میں اپنے بحری جہاز بھیج رہا ہے۔

جرمن اخبار ’’رائنیشے پوسٹ‘‘ کو دیے گئے انٹرویو میں انہوں نے بتایا کہ ایک مائن سویپر شپ اور ایک کمانڈ اینڈ سپلائی بحری جہاز بحیرہ روم بھیجے جائیں گے، تاہم ان کی روانگی کے وقت کے بارے میں تفصیلات نہیں دی گئیں۔

وزیر دفاع کے مطابق کسی بھی ممکنہ تعیناتی کے لیے فائر بندی کا برقرار رہنا، بین الاقوامی قانون کے تحت قانونی فریم ورک اور جرمن پارلیمان (بنڈس ٹاگ) کی منظوری ضروری ہو گی۔

جرمن چانسلر فریڈرش میرس پہلے ہی کہہ چکے ہیں کہ برلن آبنائے ہرمز میں بحری سلامتی کے لیے، ترجیحاً امریکی شمولیت کے ساتھ ایک کثیرالملکی مشن میں حصہ لینے کے لیے تیار ہے۔ 

ان کے مطابق جرمنی اس اہم آبی گزرگاہ میں تجارتی جہاز رانی کے تحفظ کے لیے بارودی سرنگوں کی صفائی اور بحری نگرانی میں کردار ادا کر سکتا ہے۔

وزیر دفاع پسٹوریئس نے مزید کہا کہ بارودی سرنگوں کی صفائی کے شعبے میں جرمنی نیٹو کے اندر ایک اہم اور تجربہ کار کردار ادا کرتا رہا ہے۔